अष्ट्रेलियामा नक्कली लाइसेन्सको खेलो, सक्कली भएमात्रै प्रमाणित !


 

– अजी अधिकारी/अष्ट्रेलिया

“हेलो ! अँ तपाईले भन्नुभए अनुसार तयार भो । १५ हजार क्यास लिएर सानेपा चोकमा आउनोस्, एउटा भाईले दिन्छ । तपाईलाई सक्कली होलोग्राम नै टाँसेर दिएको छु ।” गाडी चलाउन जानेका तर लाइसेन्स नक्कली लिएर अष्ट्रेलिया आएका एकमित्रले साँझको एक पार्टीमा यस्तो कहानी सुनाएको लगभग एकवर्ष भयो । 

फुल हेलमेट र मुखै नदेखिने गरी मास्क लगाएको केटाले, पल्सर बाइकमा सुट्ट आएर एकैछिनमा नयाँ लाईसेन्स दियो, १५ हजार लियो र टाप कस्यो, उनले बेलिबिस्तारमा सुनाए । अब उनलाई अष्ट्रेलियाको एकथान सक्कली लाईसेन्स नबनाईभएको छैन । उनी गाडी राम्रो चलाउँछन् । अहिलेसम्म कुनै जरिवानामा नपरेको उनको दावी छ । उनी भन्छन् “अब चाँहि पुलिसको ट्रायल राम्ररी पास गरेर सक्कली लाईसेन्स बनाउँछु ।”
“ए, अष्ट्रेलियाको भिसा लाग्यो, अब गाडी यतै सिकेर जानु, लाईसेन्स सकेदेखि सक्कली.. नभएदेखि म भन्दिन्छु, पैसा नि खासै तिर्नु पर्दैन । आजको भोलि नै हुन्छ । अष्ट्रेलिया जानेवित्तिकै गाडी चलाईहाल्नुपर्छ” भिसा लागेपछि नेपालमा अधिकांसले नक्कली नै भएपनि लाईसेन्स बनाउन उक्साउने, यस्तै सल्लाह पाउँछन् । त्यसै अनुसार केहिले कतैपनि रेकर्ड नभएको एकथान लाइसेन्स बनाउँछन् पनि । 

अष्ट्रेलिया यस्तो देश हो जहाँ कानुनको शतप्रतिशत पालनाको अपेक्षा गरिन्छ । सडकमा मोटर गाडी नचलेको बेला पनि सभ्य मान्छेले नियम विपरित बाटो काट्दैनन् ।

-AUSSIE ADHIKARI

कार चलाउनु अष्ट्रेलियाको लागि अनिवार्य आवस्यकता हो । तर कार चलाईका कारण मान्छेको ज्यान नजाओस् भनेर सरकारी ट्राफिक नियम नीकै कडा छ । मैले अहिलेसम्म हजार भन्दा बढि जरिवाना तिरिसकेँ भन्ने नेपाली छ्याप्छ्याप्ती भेटिन्छन् यहाँ । अझ क्यानबेरामा एक भुटानी भेटिए उनी भन्दैथिए “सिड्नीबाट मेलबर्न जाँदा बाटो खालि थियो, राम्रैसँग गाडी चलाएँ, अहिले त आठसय चालीस डलर जरिवाना तिर्ने चिठि पो आयो ।
प्रतिघण्टा ११० को स्पीडमा गाडी चलाउनुपर्नेमा ति मित्रले प्रतिघण्टा १७५ का दरले गाडी हुइँक्याएछन् । त्यो प्रमाण पुलिसको क्यापारमा रेकर्ड छ । सिड्नी मेलबर्न बाटोमा पाँचवटा क्यामरामा उनको बढि स्पीड रेकर्ड छ । सरकारी अधिकृतहरु उनलाई जिस्क्याउँदै भन्दैथिए “कार उडाउने सवारी साधन होइन नि त मित्र..” लाइसेन्स रद्ध गर्ने प्रहरीको निर्णयका बिरुद्ध उनी अदालतमा अपिल गर्छु भन्दैथिए ।

अष्ट्रेलिया यस्तो देश हो जहाँ कानुनको शतप्रतिशत पालनाको अपेक्षा गरिन्छ । सडकमा मोटर गाडी नचलेको बेला पनि सभ्य मान्छेले नियम विपरित बाटो काट्दैनन् । ट्राफिक सिग्नलले रोकिन भनेको बेला बाटो काटेको प्रहरी क्यामराले पक्डियो भने एकजना व्यक्तिले ७३ डलर जरिवाना तिर्नुपर्छ ।

रातो बत्तिमा गाडीले इन्टरसेक्सन पार गरे झण्डै साढे चारसय डलर तिर्नुपर्छ । ४० को स्पीड तोकिएको विद्यालय क्षेत्रमा साठीसम्मको स्पीडमा गाडी चलाए तीनसयभन्दा बढि डलर श्वाहा हुन्छ । जरिवाना तिरेर पनि सुख हुँदैन । लाईसेन्सको अंक (प्वाइन्ट) घट्दै गएर लाइसेन्स नै रद्ध हुन्छ । झण्डै १० पटक जरिवानामा परेका एकमित्र सिड्नीमा भेटिए । उनी भन्दैथिए एकवर्ष गाडी चलाउनै पाईएन । पछि फेरि आर्को लाईसेन्स बनाउनु पर्यो । त्यहि भएर अहिले त चेतबाबा भएको छु ।

नेपाली लाइसेन्स नक्कली नै भएपनि यहाँको सडक नियम राम्ररी मानेर गाडी चलाउँदासम्म त केहि हुँदैन । त्यहि भएर “खोई मलाई केहि भएको छैन !” भनेर फुर्ति लगाउनेहरु पनि भेटिनसक्छन् । तर जव कुनै कारणले प्रहरी वा अन्य निकायको सम्पर्कमा पुगिन्छ अनि नक्कली लाइसेन्स धारी व्यक्ति समस्यामा पर्ने पक्का हुन्छ ।

नेपालमा व्यक्तिले भनेको जुनसुकै कुरालाई शंकाको दृष्टिले हेरिन्छ । अष्ट्रेलियामा सामान्यतया मान्छेले साँचो बोल्छ, असल काम गर्छ, कीर्ते गर्दैन भन्ने शोचिन्छ । यहाँ कतिपय कुराहरु आफैँले घोषणा गरेपछि मान्छेले भनेको कुरा हो भनेर व्यक्तिले पत्याईदिन्छन् पनि । तर जव तपाई अलिकति मात्रै पनि गलत भएको पत्ता लाग्दैजान्छ अनि तपाईको सर्वश्व नै सकिन बेर लाग्दैन ।

“नेपाली ड्राईभिङ् लाइसेन्सलाई हामी विभिन्न टुल अर्थात् साधनहरु प्रयोग गरेर त्यसको प्रमाण परिक्षा लिन्छौ । लाईसेन्स प्रमाणित भयोभने अष्ट्रेलियाको ड्रइभिङ् लाइसेन्स लिने सजिलो प्रकृया शुरु हुन्छ” नेपाली कन्सुलेट कार्यालय भिक्टोरियाको छलफलमा नेपाली ड्रइभिङ् लाइसेन्स प्रमाणित गर्ने सन्दर्भमा भिकरोडको औपचारिक भनाई यस्तो थियो । भिकरोड भिक्टोरियाको सवारी चालक अनुमति पत्र दिने तथा रोड नेटवर्क र सुरक्षाका लागि सरकारको तर्फबाट काम गर्ने निकाय हो । 

काठमाण्डूको सडकमा पनि कुनै ट्राफिक नियम लागु हुन्छ र ? उनको प्रश्न सुनेर कार्यक्रममा उपस्थित नेपाली विद्यार्थी तथा अन्य व्यक्तिहरु खिस्स हाँसे ।

-AUSSIE ADHIKARI

नेपालीहरु ट्राफिक नियम माछन् कि तोड्छन् ? यो प्रश्न कसैले नसोधिकनै भिक्टोरियाका एक प्रहरी अधिकृतले अचम्मको जवाफ दिए । भिक्टोरिया कन्सुलेटको सार्वजनिक कार्यक्रममै उनले भनिदिए काठमाण्डूमा त ट्राफिक नियम मान्ने भन्दा तोड्ने बढि भेटिँदारछन् । काठमाण्डूको सडकमा पनि कुनै ट्राफिक नियम लागु हुन्छ र ? उनको प्रश्न सुनेर कार्यक्रममा उपस्थित नेपाली विद्यार्थी तथा अन्य व्यक्तिहरु खिस्स हाँसे । भिक्टोरिया प्रहरीका ति अधिकृत केहि समय अघि नेपाल जाँदा काठमाण्डुमा मान्छेले ट्राफिक नियम उल्लंघन गरेको देखेर छक्कै परेका रछन् ।

सक्कली वा नक्कली जुनसुकै होस्, नेपाली लाइसेन्स खल्तीमा राखेर अष्ट्रलियामा गाडी चलाइरहेकाहरुले तत्कालै अष्ट्रेलियाको सक्कली लाइसेन्स बनाउनु सवैभन्दा राम्रो । लाइसेन्स जहाँको भएपनि अष्ट्रेलियामा गाडी चलाउँदा यहाँको नियम पुरै पालना गर्नुपर्छ । सढक दुर्घटनाका कारण हुने जनधनको क्षति कम गर्न अष्ट्रेलियाका हरेक सरकारहरु असाध्यै सजग छन् । नेपाली सक्कली लाइसेन्स बोकेकाहरुलाई अष्ट्रेलियाको सवारी चालक अनुमती पत्र लिनका लागि लाईसेन्सको अग्रेजीकरण लगायतका काममा नेपाली राजदूतावास र विभिन्न शहरका महाबाणिज्य दूतावसहरुले सहयोग गर्छन् ।
[email protected]







सम्बन्धित समाचारहरू

को आउला नेपाल वायुसेवा निगमको व्यवस्थापन चलाउन ? ग्लोबल टेन्डरको तयारी
विश्वकप फुटबलको छनोटमा नेपाल र अष्ट्रेलिया भिड्ने, खेल कुन शहरमा होला ?
गुल्मी समाज भिक्टोरियाको अध्यक्षमा गान्धी भट्टराई चयन, सकियो साधारणसभा
सिड्नीमा नेपाली हिन्दु समाज अष्ट्रेलियाको श्रीमद् भागवत सप्ताह सम्पन्न
नेपाली उत्पादनको लागि ऐतिहासिक फड्को, गोल्डस्टार जुत्ताको आधिकारिक शोरुम सिड्नीमा (with Video)
वर्षातको असर, कुलेखानी जलविद्युत आयोजना पूर्ण क्षमतामा सञ्चालन, ड्याम बचाउन नियन्त्रित निकास
मेलबर्नमा मेट्रो रेल दुई कारसँग ठोक्किएर दुर्घटना, यात्रु र ड्राईभर सुरक्षित
विश्वकप क्रिकेटको उपाधि आयोजक बेलायतलाई, न्यूजिल्याण्डसँग बराबरी भएपछि सुपर ओभरमा निर्णय
error: Content is protected !!