देश

विवाह पञ्चमीको रौनक, भारतबाट आएका जन्तीको राष्ट्रपतिबाट स्वागत

अयोध्याबाट आएका जन्तीलाई राष्ट्रपति विद्यादेवी भण्डारीले स्वागत गर्नुभएको छ । राष्ट्रपति भण्डारीसँगै पर्यटनमन्त्री योगेश भट्टराइ र भूमि, व्यवस्था, सहकारी तथा गरिबी निवारणमन्त्री पद्मा अर्यालपनि कार्यक्रममा सहभागि हुनुहुन्थ्यो । विवाहपञ्चमी महोत्सवमा भारतको अयोध्याबाट आएका जन्तीलाई राष्ट्रपति भण्डारीले स्वागत तथा सम्मान गर्नुभएको हो । 

जनकपुरधामस्थित रंगभूमि मैदान बाह्र बिघामा आयोजित कार्यक्रममा राष्टपति भण्डारीले जन्तीलाई दोसल्ला र फूलमाला लगाई स्वागत गर्नुभएको थियो । उहाँले ऋषि विश्वामित्रको भूमिकामा रहेका अयोध्याका सन्त रामेश्वर दासजी महाराज, दशरथको भूमिकामा रहेका कन्हैया दास, साध्वी राधा देवी, साध्वी निलम देवी लगायत जन्तीलाई सम्मान तथा स्वागत गर्नुभएको थियो । सोही मञ्चमा राष्ट्रपति भण्डारीलाई जानकी मन्दिरका महन्थ राम तपेश्वर दास वैष्णवले जनकपुरधामको रामानन्दद्वारको प्रतिक दिएर सम्मान गरेका थिए।