हिउँपहिरामा परी मुस्ताङ र मनाङमा तीन विदेशीसहित सात जनाको मृत्यु भएको पश्चिम क्षेत्रीय प्रहरी कार्यालय पोखराले जनाएको छ । मनाङबाट पदयात्रामा हिँडेका दुई पोल्यान्डवासी, एक इजरायली र एक नेपाली मुस्ताङको झोरङ्गलमा पुग्दा अचानक माथिबाट हिउँपहिरो आई उनीहरूलाई पुरेको थियो । मृतकको भने सनाखत हुन सकेको छैन ।  नेपाली सेना र प्रहरीको उद्धार टोलीले हिउँपहिरामा पुरिएका १४ जनालाई भने हेलिकोप्टरबाट सकुशल उद्धार गरेको मुस्ताङका प्रजिअ बाबुराम भण्डारीले बताउनुभयो । हिउँपहिराले पुरिएका अन्य पर्यटकको पनि खोजी भइरहेको छ । यस्तै मनाङको नार र फु गाउँमा याक चराउन गएका तीन जनाको मृत्यु भएको मनाङ प्रहरीले जनाएको छ । मुत्यु हुनेमा नार गाविसका पूर्वअध्यक्ष ४७ वर्षीय फुर्पा लामा, ३० वर्षीय ध्याङ्चोक लामा र एक जनाको भने सनाखत हुन सकेको छैन ।

डाँडाकाँडामा भारी हिमपात

सोमबारदेखि परेको पानीसँगै मुस्ताङ र मनाङका डाँडाकाँडामा भारी हिमपात भएको छ । मुस्ताङको उपल्लो भेगका डाँडापखेरामा बाक्लो हिउँ जमेकाले निकै जाडोको महसुस गरिएको छ । मुस्ताङमा ७७ मिलिलिटर पानी परेको त्यहाँको जल तथा मौसम विज्ञान विभाग जोमसोम केन्द्रले जनाएको छ ।