एकीकृत नेकपा (माओवादी) नेतृत्वमा रहेको २२ दलिय मोर्चाले संविधान निर्माण प्रक्रियालाई सहमतीय आधारमा अगाडि बढाउन आग्रह गरेका छन् । एमाओवादीको संसदीय दलको कार्यालय सिंहदरबारमा आज बसेको मोर्चाको बैठकले विगतमा सहमति तथा सम्झौतालाई अक्षरशः कार्यान्वयन गर्दै सबै वर्ग तथा क्षेत्रले अपनत्व महसुस गर्ने संविधान निर्माण गर्नुपर्नेमा जोड दिएको छ । दलहरुबीच भएको बाह्रबुँदे सहमति, अन्तरिम संविधान, विस्तृत शान्ति सम्झौता र विभिन्न पक्षसँग भएका सहमति नै सहमतीय संविधान निर्माणको आधार भएको ठहर गर्दै मोर्चाले सरकारमा रहेका दललाई सोही आधारलाई आत्मसात् गर्न मोर्चाले अनुरोध गरेको हो । बैठकपछि सञ्चारकर्मीसँग कुरा गर्दै एमाओवादी सचिव वर्षमान पुनले आजको बैठकमा शुक्रबारको जनसभालगायत मुलुकका विभिन्न स्थानमा भएका आन्दोलनको कार्यक्रमको समीक्षा भएको जानकारी दिनुभयो । मोर्चाले नेपाल सम्वत्का अवसरमा काठमाडौँमा चियापानको आयोजना गर्ने र विभिन्न जिल्लामा जिल्ला समन्वय समितिको आयोजनामा अन्तक्र्रिया र चियापानको आयोजना गरिने सचिव पुनको भनाइ छ । यस्तै पाँचथर, जनकपुर, कैलालीमा सचेतना सभाको आयोजना गरिनेछ । कार्यक्रमको मिति भने मोर्चाको सचिवालयले तय गर्ने बताइएको छ । बैठकमा एमाओवादी अध्यक्ष पुष्पकमल दाहालले पछिल्लो दिनमा प्रमुख दलहरुबीच भएको वार्ता र सम्वादका क्रममा उठेका विभिन्न विषयका बारेमा जानकारी गराउनुभएको सचिव पुनले बताउनुभयो । आफूहरुको आन्दोलनले सरकारमा रहेका दललाई सहमतिका लागि बाध्य बनाउँदै लगेको उल्लेख गर्दै सचिव पुनले अझै पनि ठूला दलले नचेते संविधानसभाभित्र र बाहिर दुवै स्थानबाट प्रतिवाद गरिने जानकारी दिनुभयो ।