कात्तिक शुक्ल चतुर्थी तिथिबाट व्रतालुले विधिवत्रुपमा चोखो भएर सुरु गरेको छठपर्वको तेस्रो दिन षष्ठी तिथिमा आज अस्ताउँदै गरेको सूर्यको अघ्र्य अर्पण गरिएको छ । जलाशयका किनारमा पूजाका सामग्री राखेर छठपर्व मनाइने भएकाले मोरङलगायत पूर्वाञ्चल क्षेत्रका खासगरी तराईका जिल्लामा छठ मनाइने जलाशय क्षेत्रलाई पूर्णरुपमा सफासुग्घर गर्नुका साथै बेहुलीझैँ शृङ्गारिएको छ । सोही क्रममा मोरङको सिग्याही खोला र अन्य पोखरीका साथै सुनसरी र मोरङ जिल्लामा कोसी नहरको डिललाई पनि व्यापक रुपमा सजाइएको देखिन्छ । बिहानैदेखि पूजास्थलमा पूजाका सामग्री राख्ने क्रम थियो । व्रतालुले कम्मरसम्म पुग्ने जलाशयमा प्रवेश गरेर सूर्यको आराधना गरी पूजाका लागि ल्याइएका प्रसादसहित अघ्र्य अर्पण गरेका छन् । यस अवसरमा अन्य महिलाले छठपर्वका गीतहरू गाउँदै मङ्गलको कामना गरेका थिए । अस्ताउँदै गरेको सूर्यलाई अर्पण गरेपछि रातभर जाग्राममा बस्न नसक्नेहरू साँझको समयमा घर फर्कने गर्छन् । एकाबिहानै करिब ३ बजे उठेर पुनः सोही प्रसाद लिएर पूजास्थलमा पुगी उदाउँदै गरेको सूर्यलाई अघ्र्य अर्पण गरेपछि चार दिनदेखि सुरु भएको छठपर्व सम्पन्न हुन्छ । खासगरी मुलुकमा मैथिल, भोजपुरी, थारुलगायतका समुदायमा मात्र सीमित रहेको छठपर्व विगत दुई दशकदेखि क्रमिक रुपमा नेपाली भाषाभाषी, बङ्गाली मारवाडी, राजवंशीलगायतका परिवारले मनाउन थालेका छन् ।