प्रमुख तीन राजनीतिक दलको दलगत अडानका कारण संवैधानिक राजनीतिक संवाद तथा सहमति समितिको आजको बैठकमा पनि कुनै सहमति हुन सकेन । समितिको शुक्रबार सिंहदरबारमा बसेको बैठकमा संविधानको प्रमुख विवादित विषयमा छलफल भए पनि कुनै सहमति हुन सकेको छैन । संविधानसभाले विवादित विषयमा सहमति जुटाउन दिएको समयसीमा पूरा हुन एक दिन मात्रै बाँकी छ । शीर्ष नेतृत्वमा नै छलफल गर्नुपर्ने भन्दै सभासद्ले माग गरेपछि बैठकमा कुनै पनि विषयमा ठोस छलफल नभएको समितिका सभापति डा बाबुराम भट्टराईले जानकारी दिनुभयो । हालसम्म अनौपचारिक तथा औपचारिक छलफलका बारेमा बैठकमा जानकारी गराइएको तर दलगत अडानका कारण कुनै निष्कर्ष निस्कन नसकेको उहाँले सञ्चारकर्मीलाई बताउनुभयो । विवाद भए पनि सहमति हुने सम्भावना कायम रहेको तर उक्त सम्भावना नरहेको सन्दर्भमा कसरी अगाडि बढ्ने भन्ने विषयमा डा भट्टराईले सभासद्सँग छलफल गर्नुभएको थियो । संविधानसभाले समितिलाई सहमति जुटाउन चार पटक म्याद थप गरिसकेको छ । पछिल्लो पटक यही कात्तिक १५ गतेसम्म अन्तिम पटक भन्दै समय थप गरेको थियो । विवादित विषयमा शीर्ष नेतृत्व तहमा नै सहमति गरेर शनिबार पुनः बैठक बस्ने भएको छ । बैठकपछि सभासद् लक्ष्मणलाल कर्णले भने सहमति भए सहज हुने र सहमति नभएको खण्डमा के गर्ने भन्ने विषमया समान धारणा नआएको जानकारी दिनुभयो । ‘‘कार्यतालिकाअनुसार सहमति नभएका विषयलाई प्रश्नावली बनाउनुपर्ने हो, सहमति पनि भएको छैन, समय पनि छैन यस्तो अवस्थामा शनिबारको बैठकमा ठोस निर्णय गरिन्छ’’ सद्भावना पार्टीका सहअध्यक्ष कर्णले भन्नुभयो ।