संवैधानिक राजनीतिक संवाद तथा सहमति समितिका सभापति डा. बावुराम भट्टराईले संविधानका विवादित विषयमा सहमतिको लागि अन्तिम समयसम्म अधिकतम प्रयास गरिने बताउनुभएको छ ।समितिका सभापति डा. भट्टराईले विवादका मुख्य विषयमा कुरा मिलेपछि त सहमतिमा पुगिहालिन्छ भन्नुभयो । “मुख्य ताल्चा एकपटक खोलेपछि त खुलिहाल्यो त्यसपछि अघि बढ्न समय त लाग्दैन नि, त्यो खुल्नलाई अलि समय लागेको हो,” सभापति डा. भट्टराईले भन्नुभयो । उहाँले १५ गते सहमतिको लागि फेरि अन्तिम प्रयास गर्ने जानकारी दिनुभयो ।       विवादित विषयमा सहमति हुन नसके प्रश्नावली लिएर संविधानसभामा जाने हो कि भन्ने प्रश्नमा समितिका सभापति डा. भट्टराईले त्यसबारेमा हामी समितिमा छलफल गछौ के निर्णय हुन्छ सोही अनुसार अघि बढ्छौ भन्नुभयो । नेपाली काँग्रेस र नेकपा (एमाले)ले सहमति हुन नसके प्रक्रियामा जानुपर्नेमा जोड दिएका छन् नी भन्ने प्रश्नमा डा. भट्टराईले त्यो कुरा पनि उहाँहरूले बुझनुभएको बताउँदै सहमति र मतदान पनि प्रक्रिया भएकाले सबै विषयमा सहमति चाहिन्छ भन्नुभयो । संविधानसभाले संवैधानिक राजनीतिक संवाद तथा सहमति समितिलाई तेस्रो पल्ट संविधानका विवादित विषयमा सहमति जुटाउने समयसीमा तोकेको छ ।