नेकपा (एमाले)का उपाध्यक्ष भीमबहादुर रावलले बैठक नबोलाउने भए संवैधानिक राजनीतिक संवाद तथा सहमति समितिका सभापति डा बाबुराम भट्टराईले पद छाड्नुपर्ने बताउनुभएको छ । यहाँ आयोजित साक्षात्कारमा उहाँले डा भट्टराईले काँग्रेस र एमालेसहितको दलले पेस गरेको प्रस्तावलाई प्रक्रियामा नलागेमा र तत्काल बैठक नबोलाए आफूहरूले लिखितरूपमै दबाबपत्र पेस गर्ने बताउनुभयो । सांसद रावलले भन्नुभयो–हामीहरूले पेस गरेको साझा प्रस्तावमाथि छलफल हुनुपर्छ, तत्काल बैठक नबोलाएर आलटाल गरे हामीहरू दुई तिहाईभन्दा बढी सभासद्को हस्ताक्षरसहितको लिखित दबाबपत्र पेस गर्छाैँ । नेपाली काँग्रेसका नेता गोपालमान  श्रेष्ठले आगामी माघ ८ गतेभित्रै संविधान जारी गर्ने सर्तमा आफूहरू आठ प्रदेशमा जानसमेत तयार रहेको स्पष्ट पार्दै कांग्रेस र एमालेको साझा धारणामा आशङ्का नगरी प्रस्तावमा छलफल गरेर सहमति खोज्न एमाओवादीलाई आग्रह गर्नुभयो । एमाओवादी)का नेता शक्तिबहादुर बस्नेतले कांग्रेस र एमाले सहमतिबाट पछि हटेर संविधान निर्माणमा बाधक बनेको आरोप लगाउँदै संविधान जारी गर्न अहिले सहमति नै आवश्यक रहेकामा जोड दिनुभयो । सङ्घीय सद्भावना पार्टीका अध्यक्ष अनिलकुमार झाले काँग्रेस–एमालेले दुई तिहाई बहुमतबाट संविधान जारी गरे मुलुकमा स्थायी शान्ति कायम हुन नसक्ने विचार व्यक्त गर्नुभयो ।