इ–व्यापारमा बृहत् संस्था अलीबाबाका संस्थापक ज्याक मा हाल चीनका सबैभन्दा धनी व्यक्ति हुनुहुन्छ तर उहाँले एक अमेरिकी टेलिभिजन अन्तर्वातामा यत्ति धेरै धनी बन्नु वास्तवमा उहाँका लागि ठूलो पीडा बनेको बताउनुभएको छ । सेप्टेम्बर महिनामा न्यु योर्क शेयर बजारमा अलिबाबाको २५ अर्ब अमेरिकी डलर बराबरको शेयर बिक्री भएपछि माको सम्पत्ति १९.५ अर्ब अमेरिकी डलर पुगेको छ । उक्त तथ्याङ्क फोर्बसको पत्रिकाको हो । मङ्गलबार यस संस्थाले २४ घण्टाको एक दिनमा ९.३ अर्ब अमेरिकी डलर बराबर व्यापार गरेको देखिएको छ । यो हालसम्म अनलाइन खुद्रा व्यापारमा सबैभन्दा अधिक बिक्री हो । शेयर बजारमा सफलतापूर्वक सूचीबद्ध हुनु तथा धेरै सम्पत्ति देखिनु आफ्ना लागि तनावपूर्ण भएको माले अमेरिकी व्यापारिक समाचार च्यानल सीएनबीसीलाई मङ्गलबार बताउनुभयो । उहाँले यस महिना आफू धेरै खुसी नभएको र धेरै दबाब भोगेको बताउनुभयो । ‘‘हुनसक्छ शेयरको मूल्य बढोस्, हुनसक्छ मानिसको अपेक्षा तपाईँप्रति बढोस्, हुनसक्छ म भविष्यका बारेमा धेरै सोचूँ र मसँग चिन्ता गर्नुपर्ने धेरै कुरा छन्’’, उहाँले भन्नुभयो । दुई महिनामा न्यु योर्कमा सूचीबद्ध भएपछि अलीबाबाको शेयरको मूल्य निरन्तर बढिरहेको छ । मङ्गलबार यसको मूल्य ११४.५४ अमेरिकी डलरमा पुगेको थियो । यस संस्थाको शेयर आरम्भमा ६८ अमेरिकी डलरमा बिक्री भएको थियो भने यसले ७० प्रतिशत नाफा कमाएको छ । माले मानिसले धनी हुनु राम्रो भएको बताए पनि उहाँले चीनमा धनु बन्नु कठिन भएको बताउनुभयो । ‘‘हो, यो राम्रो कुरा हो तर चीनमा सबैभन्दा धनी व्यक्ति हुनु राम्रो होइन । तपाई विश्वको सबैभन्दा धनी व्यक्ति हनुहुन्छ तब त्यो ठूलो पीडा बन्ने गर्छ । सबैजना तपाईँसँग पैसाका लागि घेर्ने गर्छन्’’, मा ले सीएनबीसीलाई भन्नुभयो । उहाँले सडकमा हिँड्दा आफूलाई मानिसले भिन्न तरिकाले हेर्ने गरेको बताउँदै ‘‘पैसा कमाउनुभन्दा खर्च गर्नु बढी कठिन हुने’’ बताउनुभयो । उहाँले अक्टोबर महिनामा चीनमा सबैभन्दा धनी व्यक्ति हुनु अर्थहीन भएको बताउनुभएको थियो । उहाँले आफूले प्रति महिना ९० युआन (१५ अमेरिकी डलर) कमाउँदा आफू सबैभन्दा सुखी व्यक्ति भएको बताउनुभएको थियो । उहाँले उक्त रकम व्यापारिकरूपले खर्च गर्ने एक संस्था स्थापना गर्ने सम्भावनामा सोचिरहनुभएको बताउनुभयो । उहाँले यस विषयमा अमेरिकी अरबपति बिल गेट्ससँग प्रतिस्पर्धा गर्ने सम्भावना पनि भएको बताउनुभयो । माले वातावरण, स्वास्थ्य र शिक्षाका क्षेत्रमा काम गर्ने एक संस्था स्थापना गर्न आफ्नो व्यापारको १.४ प्रतिशत रकम दान दिनुभएपछि उहाँ चीनमा सबैभन्दा बढी दान गर्ने व्यक्ति बन्नुभएको हुरुनले गत अक्टोरमा जानकारी दिएको थियो ।