इसाई धर्मावलम्बीको पर्व ‘क्रिस्मस’का बेला नेपाल सुन्दरीले बनाएको विशेष केक खान चाहनुहुन्छ भने यसका लागि बानेश्वरस्थित एभरेष्ट होटलमा पुग्नुपर्ने हुन्छ । यस वर्षको क्रिस्मसका लागि भनेर एभरेष्ट होटलले आज पूर्व मिस नेपाल उषा खड्गी, सुगरिका केसी र मिस ग्लोबल निलम चन्दलाई विशेष केक बनाउन डाकेको थियो । सुन्दरीले भान्छेको ड्रेस लगाएर केक तयार पारेका थिए । सेतो रङ्गको ‘एप्रोन’ र टोपी लगाएर केक बनाउँदै गर्दा उनीहरु निकै रमाइलो मानिरहेका थिए । ग्लोबल सुन्दरी निलमले यस्तो कार्यक्रममा पहिलो पटक भाग लिएकाले पनि आफूलाई साह्रै रमाइलो लागेको र बनाउँदा बनाउँदै आफैँले बनाएको केक खान मन लागेको बताइन् । केकका लागि आवश्यक बदाम, काजु, किसमिस, अदुवा, सुन्तला, अलैँची, सुकुमेललगायत खाद्यवस्तुलाई वाइनमा मिसाएर एक महिना पकाउनका लागि राखिएको छ । सबै वस्तुलाई एकै ठाउँमा राखेर सुन्दरीले रमाइलो मान्दै मोलेका थिए । यस कार्यलाई ‘केक मिक्सिङ’ को नाम दिइएको थियो । सबै मिसाउँदा ३२ किलो भएको एभरेष्टका कार्यकारी सेफ गोविन्द नरसिंह केसीले बताउनुभयो । अहिले ३२ किलो रहेको सो सामग्री एक महिनापछि केक तयार हुने बेलामा कम्तिमा पनि ५५ किलो हुनेछ । होटलको बेकरीमा केक बनाएर राखिने र क्रिस्मसको बेलामा हुने पार्टीमा केक ‘सर्भ’ गरिने उहाँले जानकारी दिनुभयो । पन्ध्रौँ शताब्दीदेखि क्रिस्मस मनाउन थालिएको बताइन्छ । युरोपका मुलुकले क्रिस्मसका बेला नाचगान, पार्टी र भेटघाटका कार्यक्रम गर्ने परम्परा सुरु गरेको उहाँ बताउनुहुन्छ । नेपालमा पनि यसरी क्रिस्मसका बेलामा सेलिब्रेटीहरुलाई डाकेर केकलगायत विभिन्न खानेकुरा तयार गर्न लगाउने काम होटल सोल्टीबाट सुरु भएको केसीको भनाइ छ । सोल्टीले सन् १९६५ देखि विभिन्न कूटनीतिक क्षेत्रका महिला, पत्रकार, गैससका वरिष्ठ महिलालाई बोलाएर क्रिस्मसका बेला खानेकुरा बनाउन लगाउने गरेको र अहिले एभरेष्टले पनि सोही कार्य सुरु गरेको उहाँले बताउनुभयो । सन् १९३० मा जापानले यस्तो खालको कार्यक्रम गरेको उहाँको भनाई थियो । हिन्दू परम्परामा दशैँ, तिहारजस्ता पर्वमा यसरी आफन्त, नातागोतामा भेटघाट गरिन्छ भने अब क्रिस्मसलाई गैह्रइसाई समुदायले पनि सहभागी भई रमाइलो गर्ने र एकआपसमा सद्भाव बाँड्ने अवसरको रुपमा लिनुपर्नेमा उहाँले जोड दिनुभयो । आगामी डिसेम्बर २५ अर्थात् पुस १० गतेका दिन विशेष गरी इसाई धर्मावलम्बीले क्रिस्मस पर्व मनाउने गर्छन् । अहिले भने इसाई मात्र नभई अन्य धर्मावलम्बीले समेत क्रिस्मसलाई खुशीयाली बाँड्ने अवसरका रुपमा लिई यो पर्व मनाउने गर्दछन् ।