सुनसरी जिल्लाको खनार गाविससँग सीमा जोडिएको मोरङ जिल्लाको सिसवनी बडहरा–७ का टेकेन्द्र फुयालको विवाहको अघिल्लो दिन भोज खाएका आफन्त तथा इष्टमित्रमध्ये ६५ जना अझै उपचाररत छन् ।  कसार रोटी, दालभात र तरकारी खाएका ८० जना सिकिस्त बिरामी परेका थिए । तीन दिनअघि विवाहको अघिल्लो रात कसार बटार्ने र पूजापाठ सिध्याएर साँझको खाना खाने आफन्त छरछिमेक सबै रातिदेखि बिरामी परेका थिए । बेहुला टेकेन्द्रसहित १२ जना भने विवाहपछि घर फर्किसकेका छन् । उनी खनारस्थित नमुना अस्पतालमा स्लाइन पानी चढाउँदै जग्गेमा बसेर विवाह सिध्याएपछि पनि अस्पतालमा उपचार गर्न बाध्य भएका थिए । नोबेल मेडिकल कलेजमा उपचारार्थ भर्ना भएका फुयाल परिवार तथा आफन्त र छिमेकीको उपचारमा नोबेल मेडिकल कलेजले विशेषरूपमा ध्यान दिएकाले बिरामीहरू चाँडै स्वस्थ भइरहेको बताइएको छ । विवाहको अघिल्लो साँझ कसैले रोटीमात्र खाएको र उनीहरू पनि बिरामी भएकाले तरकारीमा विषादी भएको आशङ्का गरिएको थियो । तर तरकारी नखाएका आफन्तसमेत बिरामी परेपछि त्यहाँ प्रयोग गरिएको खुसी ब्रान्डको तेल विषादीयुक्त थियो कि भन्ने शङ्का जन्मेको छ । विवाह भोज खाएका बेहुलाका आफन्त तथा छिमेकीलाई खाएको तीन घन्टापछि टाउको दुख्ने, रिँगटा लाग्ने र झाडापखाला चल्नेजस्ता सङ्क्रमणले सताएपछि बाध्य भएर ती सबैलाई अस्पताल भर्ना गर्नुपरेको बेहुलाका आफन्तले बताएका छन् । बेहुला टेकेन्द्रकी दिदी सीता दाहालका अनुसार बिरामीमध्ये धेरैको स्वास्थ्यमा सुधार आइसकेको र अहिलेसम्म बेहुला टेकेन्द्रसहित १२ घर फर्किसकेका छन् । बेहोस अवस्थामा रहेका ११ वर्षीय मनोज भगतको पनि हिजोदेखि होस खुलेको छ ।