बजारमा पेट्रोलियम पदार्थकोे अभाव भएपछि वाणिज्य तथा आपूर्ति व्यवस्थापन विभागले काठमाडौँ उपत्यकामा सञ्चालित पेट्रोल पम्पको अनुगमनलाई प्रथमिकता दिएको छ । उपत्यकामा ११३ पेट्रोल पम्प सञ्चालनमा छन् । ती पम्पबाट दैनिक डिजेल र पेट्रोल गरी एक हजार १०० किलोलि बिक्री हुने गरेको छ । बजारको मागअनुसार पेट्रोलियम पदार्थ नपाएपछि बजारमा आभाव भएको पम्प सञ्चालकले जनाएका छन् । उता निगमले केही उद्योगी व्यवसायी एवम् होटेलले पेट्रोलियम पदार्थ भण्डारण गरेका कारण बजारमा अभाव देखिएको आशङ्का गरे पनि अनुगमनका क्रममा त्यस्तो नपाइएको विभागले जनाएको छ । बजार अनुगमनका क्रममा कुनै पनि पम्प तथा उद्योगीले पेट्रोलियम पदार्थको भण्डारण नगरेको विभागका बजार अनुगमन निर्देशक हरिनारायण बेल्वासेले राससलाई जानकारी दिनुभयो । उहाँले भन्नुभयो, “बजारमा पर्याप्त नभएकाले नै डिजेल र पेट्रोलको अभाव भएको हो, भण्डारणका कारण होइन ।” निगमले पेट्रोल पम्पलाई उपलब्ध गराएको डिजेल केही घन्टाभित्र नै सकिने गरेको छ । कुनै पेट्रोल पम्पले डिजेल मात्र बिक्री गरेका छन् भने कुनै कुनैले पम्पले मात्र पेट्रोल तथा डिजेल दुवै बिक्री गर्दै आएका छन् । डिजेल बजारमा नहुँदा साधारण उपभोक्ता मारमा परेका छन् । पेट्रोलियम डिलर्स एसोसियसनका अध्यक्ष लीलेन्द्र प्रधानले निगमले मागअनुसारकोे आपूर्ति नगरेको बताउनुभयो । “बजारमा आवश्यकताअनुसार पेट्रोलियम पदार्थ पाइएको छैन, त्यसले गर्दा उपभोक्ता मारमा परेका हुन्”, उहाँले भन्नुभयो“ उपभोक्ताले भण्डारण गरेको कुराको कुनै आधार छैन ।” निगमका अनुसार बजारमा ४५० किलोलि पेट्रोल र ५५० किलोलि डिजेल उपत्यकामा खपत हुँदै आएको छ । निगमका प्रवक्ता मुकुन्दप्रसाद घिमिरेले ग्यासको आपूर्तिमा असहज भए पनि डिजेल र पेट्रोल पर्याप्त मात्रामा उपलब्ध गराएको जिकिर गर्नुभयो । उहाँले केही उद्योगी तथा होटेल व्यवसायीले यही पुसको अन्त्य तथा आगामी माघको सुरुमा बन्दहडताल गर्ने भन्ने हल्लाका कारण भण्डारण गरेको हुन सक्ने आशङ्का गर्नुभयो । निर्देशक वेल्वासेले ५० भन्दा बढी पेट्रोल पम्पमा गरिएको अनुगमनबाट कसैले पनि ठूलो परिमाणमा खरिद नगरेकाले भण्डारण गरेको भन्न नमिल्ने बताउनुभयो ।