भारतीय पूर्वमन्त्री शशी थरुरकी पत्नी सुनन्दा पुस्करको आत्महत्या नभई विष खुवाई हत्या भएको भन्दै भारतीय प्रहरीले त्यसको छानबीन गर्न समिति गठन गरेको छ । उहाँको मृत्युको बारेमा छानबीन जारी राखेको प्रहरीले मङ्गलबार मात्र सो तथ्य बाहिर ल्याएको थियो । गत जनवरी महिनामा नयाँ दिल्लीको एक पाँचतारे होटलमा उनको शव भेटिएको थियो । ५२ वर्षीया सुनन्दाको शव रहस्यमय रुपमा सो होटलमा भेटिएको थियो । पत्रकार सम्मेलनमा प्रहरी प्रमुख बासीले भने– हामीले छानबीन समिति गठन गरेका छौँ, सो समितिले थप तथ्य पत्ता लगाएपछि हामी जानकारी दिनेछौँ । सुनन्दाको परिवारले उनले आत्महत्या गरेको बताउँदै आएको थियो । उनको मृत्युको बारेमा अनुसन्धान जारी राखेको प्रहरीले मङ्गलबारमात्र उनको विष सेवन गराएर हत्या गरिएको तथ्य बाहिर ल्याएको थियो । त्यस पत्रकार सम्मेलनका क्रममा उहाँका पति एवम् भारतीय पूर्वमन्त्री थरुरलाई पनि प्रश्न गरिने छ वा छैन भन्ने पत्रकारको जिज्ञासामा दिल्ली प्रहरी प्रमुख बासीले स्पष्ट केही बताउनुभएन । उहाँले भन्नुभयो– त्यस्तो कुनै अवस्था आयोभने उहाँलाई पनि सोधपुछ त गर्नैपर्छ र आवश्यक प¥यो भने हामी गर्नेछौँ । सो हत्यामा कतिपयले उनकै पति थरुरको हात रहेको आरोप पनि लगाउने गरेका छन् । तर त्यसलाई थरुरले भने ठाडै अस्विकार गर्दै आएका छन् । यस विषयमा अहिलेसम्म उहाँमाथि प्रहरीले भने कुनै आरोप लगाएको छैन । उनको निधनपछि थरुरलाई कुनैपनि हिसाबले प्रहरीले मुछ्ने गरेको छैन । स्थानीय टेलिभिजनहरुले उनलाई खुवाइएको भनिएको विष कुन थियो र कसरी खुवाइएको थियो भन्ने बारेमा थप परीक्षण गर्नको लागि प्रहरीले उहाँको भिसेरा अमेरिका पठाउन लागेको जानकारी दिएका छन् । प्रहरीले पनि त्यस विषको बारेमा अध्ययन गर्न भिसेरा विदेश पठाउन सकिने बताएको छ । तर त्यस विषयमा प्रहरीको निर्णय भने बाहिर आएको छैन । दुबहीमा व्यापार गर्दै आएकी सुनन्दा र थरुरबीच सन् २०१० मा विवाह भएको थियो । पछिल्लो वर्षमा थरुरको एकजना पाकिस्तानी पत्रकारसँग सम्बन्ध रहेको भनी सुनन्दा र थरुरका बीचमा खटपट सुरु भएको बताइएको थियो । त्यसैले पनि कतिपय पक्षले उनको हत्यामा थरुरको हात रहेको बताएका थिए । तर त्यस बारेमा अहिले सम्म कुनैपनि सम्भावनाको स्रोत नमिलेको जानकारी प्रहरीले दिँदै आएको छ । तर प्रहरीले पनि सुरुमा उनको आत्महत्याबाटै मृत्यु भएको अनुमान गरेको थियो । तर पनि पछिल्लो अनुसन्धानबाट भने उनलाई विषय खुवाइएको तथ्य पत्ता लागेको जानकारी प्रहरीले अकस्मात बाहिर ल्याएको छ ।