फ्रान्सको राजधानीमा आतङ्कवादी आक्रमणका कारण १७ व्यक्तिको मृत्युभएपछि यस्तो घटनाप्रति चुनौती दिँदै ऐतिहासिक रूपमा एकता प्रदर्शन गर्न पेरिसमा आयोजित यात्रामा लाखौँ व्यक्तिका साथै विश्वका दर्जनौँ नेता भेला भएका छन् । फ्रान्सेली राष्ट्रपति फ्राँस्वा अलोँका साथमा इजरायली प्रधानमन्त्री बेन्जामिन नेतान्याहु तथा प्यालेस्टाइनी नेता महमुद अब्बास यस व्यापक यात्राका अग्रभागमा अगाडि बढ्नुभयो । यो यात्रा बन्दुकधारीले १२ व्यक्तिको हत्या गरेको व्यङ्ग्यात्मक पत्रिका चार्ली हेब्दोको नजिकैबाट आरम्भ भएको थियो । पेरिसको यात्रामा फ्रान्सको राष्ट्रिय गीत पनि गाइएको थियो । यसबीच फ्रान्स तीन दिनसम्मको रक्तपातयुक्त हिंसाप्रति श्रद्धाञ्जलि व्यक्त गरिरहेको छ । भीडले धर्मगुरु मोहम्मदको व्यङ्ग्यचित्र प्रकाशन गर्दा मारिएका व्यङ्ग्यचित्रकार तथा पत्रकारप्रति सम्मान व्यक्त गर्दै चार्ली चार्ली भनी नारा लगाएको थियो । यस यात्रामा जोर्डनका नरेश तथा रानीको उपस्थिति थियो भने जर्मन चान्सलर एङ्गेला मर्केल र बेलायती प्रधानमन्त्री डेभिड क्यामरुन पनि उपस्थित हुनुहुन्थ्यो । इटालीका प्रधानमन्त्री मेटेओ रेन्जीले युरोपले आतङ्कवादविरुद्ध चुनौतीमा विजय हासिल गर्ने बताउनुभयो । अमेरिकी राष्ट्रपति बाराक ओबामालाई उहाँका महान्यायाधीवक्ता एरिक होल्डरले प्रतिनिधित्व गर्नुभएको थियो । भारतमा एक समारोहमा भारतीय प्रधानमन्त्री नरेन्द्र मोदी र अमेरिकी विदेशमन्त्री जोन केरीले आफूहरू फ्रान्सेली जनताका साथमा रहेको बताउनुभएको थियो । फ्रान्सेली राष्ट्रपति अलोँले आज पेरिस विश्वको राजधानी भएको र सम्पूर्ण मुलुक अगाडि बढ्ने बताउनुभयो ।