इन्डोनेसियाका पौडीबाजहरूले जाभाको समुद्र क्षेत्रमा १६२ यात्रुसहित दुर्घटनाग्रस्त एयरएसियाको विमानको उडानसम्बन्धी तथ्याङ् विवरण रहने यन्त्र ‘फ्लाइट डेटा रेकर्डर प्राप्त गरेका छन् । यसले उक्त विमान किन दुर्घटनाग्रस्त भयो भन्ने सम्बन्धमा थाहा पाउने प्रयासमा सम्भावित नयाँ उपलब्धि प्राप्त गर्न सघाउनेछ । पौडीबाजहरूले पहिलो ब्ल्याक बक्स फेला पारेको स्थानबाट केही पर दोस्रो ब्ल्याक बक्स अथार्त ‘ककपिट भ्वाइस रेकर्डर’ फेला पारेका थिए । यसो भए पनि दोस्रो ब्ल्याक बक्स भग्बनावशेषबीच परेकाले त्यसलाई प्राप्त गर्न नसकिएको अधिकारीहरूले बताए । उनीहरूले दुर्घटनाको नयाँ नाटकीय विवरण पनि दिएका छन् । उनीहरूले दबाबमा छिटो परिवर्तनका कारण विमानमा पानीमा छुनासाथ विस्फोट भएको बताए । नौसेनाका पौडीबाजहरूले ‘फ्लाइट डेटा रेकर्डर’ बिहानै जहाजमा ल्याएको राष्ट्रिय उद्धार प्रमुख बामबाङ सोएलिस्त्योले बताउनुभयो । यसअघि उनीहरूले चौध दिनसम्म दिक्कलाग्दो खोज गरेका थिए र त्यसलाई पनि खराब मौसमले प्रभावित बनाएको थियो । सोएलिस्त्योले जकार्तामा पत्रकारहरूलाई आफूहरूलाई ‘फ्लाइट डाटा रेकर्डर’ भनिने ब्ल्याक बक्सको एक भाग समुद्रबाट माथि ल्याउन सफलता प्राप्त भएको बताउनुभयो । उद्धार संस्थाका निर्देशक एस।बी सुप्रियादीले दोस्रो रेकर्डर माथि ल्याउने प्रयास मङ्गलबार आरम्भ हुने बताउनुभयो । उक्त ब्ल्याक बक्स पहिलो ब्ल्याक बक्सभन्दा करिब २० मिटर पर जहाजको पखेटामा च्यापिएर रहेको जानकारी दिइएको छ ।