फ्रान्सका धेरै समाचार साइटहरू शुक्रबार त्यसका सञ्चालकले प्राविधिक समस्या भनी अवरुद्ध पारेपछि सुरक्षा विशेषज्ञहरूले त्यसमा सम्भावित इस्लामी ह्याक भएको आशङ्का गरेका छन् । बीस हजारभन्दा बढी फ्रान्सेली वेब साइटहरूमाथि आक्रमण भएको छ यसलाई फ्रान्सेली सेनाका साइबर–सुरक्षा विशेषज्ञहरूले सबैलाई थाहा भएको इस्लामी ह्याकरको काम भएको बताएका छन् । फ्रान्सको व्यङ्ग्यात्मक पत्रिका चार्ली हेब्दोमा जनवरी ७ मा जिहादीहरूले आक्रमण गरेपछि यी ह्याकरहरू सक्रिय भएको बताइएको छ । यस आक्रमणमा १२ व्यक्तिको मृत्युभएको थियो । ट्वान्टी मिनेट्स, लेक्सप्रेस, मेडियापार्ट, फ्रान्स इन्फो, फ्रान्स इन्टर, ली पेरिसियाँ, स्लेट, जीडीनेट तथा म्यारिने शुक्रबार १० बजे बन्द भएका थिए । केही वेबसाइट करिब डेढ घण्टामा पुनः सञ्चालन भएका थिए । एएफपीले सम्पर्क गर्दा वेब सञ्चालक ओक्सालाइडले वेबसाइटमा पूर्ण रूपमा पहुँच प्राप्त नभएसम्म यसका विषयमा टिप्पणी नगर्ने बतायो । यस घटनाबाट प्रभावित सीयुपी इन्टरएक्टिभ समूहका सम्पादकीय निर्देशक एमानुएल प्यारोडीले एएफपीलाई ओक्सालाइडले आफूलाई आरम्भमा सम्भवत ह्याकरले आक्रमण गरेको हुनसक्ने बताएको जानकारी दिए । उनले प्राविधिक गडबडी भएको हुनसक्ने सम्भावना पनि रहेको पनि जानकारी दिइएको बताए । केही अनलाइन सुरक्षा विशेषज्ञले यस कार्यका पछाडि आशङ्कित ह्याकर रहेको अनुमान गरेका छन् । केही समूहले जनवरी १५ मा यस्तो क्रियाकलाप गर्ने दाबी गरेको तर त्यसो नभएको उनीहरूले बताएका छन् ।