फिलिपिन्समा पक्राउ आदेश जारी भएका लडाकूको खोजीमा रहेको समयमा मुसलमान विद्रोहीसँग भएको भिडन्तमा ४० भन्दा बढी प्रहरी कमान्डोको मृत्यु भएको जानकारी प्रहरीले सोमबार दिएको छ । यस विद्रोही समूहसँग शान्ति सम्झौता भए पनि उक्त सङ्घर्ष भएको र फिलिपिन्सको सुरक्षा बलले हालका वर्षमा यति धेरै सुरक्षाकर्मी गुमाएको पहिलोपटक भएको जानकारी गृहमन्त्री म्यानुएल रोक्सासले दिनुभयो । राष्ट्रिय प्रहरी प्रमुख लियोनार्दो एस्पिनाले एक पत्रकार सम्मेलनमा मुलुकको दक्षिणी भागमा रहेको मिन्दानाओ द्वीपको विद्रोहीको बलियो नियन्त्रण रहेको मामासापानोमा ४३ कमान्डोको मृत्यु भएको जानकारी दिनुभयो । क्षेत्रीय प्रहरी प्रवक्ता जुडिथ आम्बोङले एएफपीलाई ४९ प्रहरीको शव प्राप्त भएको बताउनुभयो । उक्त घटनामा एघार प्रहरी घाइते भएका थिए भने मुसलमान विद्रोहीतर्फ भएको क्षतिका विषयमा कुनै पनि जानकारी दिइएको छैन । जुल्किफ्ली बिन हिर नामक व्यक्तिको खोजीमा रहेका करिब ४०० प्रहरी कमान्डोले शान्ति सम्झौतालाई अस्वीकार गर्ने र प्रमुख विद्रोही इस्लामी समूहबाट भिन्न भएको बाङसामोरो इस्लामिक फ्रिडम फाइटर्स लुकेर रहेको स्थानमा कारवाही गरेको थियो । गृहमन्त्री रोक्सासले प्रहरीले जेमाह इस्लामिया समूहका लागि बम बनाउने जुल्किफ्लीलाई मारेको दाबी गर्नुभएको छ । यस समूहले सन् २००२ मा बालीमा बम आक्रमण गरेको थियो भने अन्य घातक आक्रमण गरिरहेको छ । जुल्किफ्ली अमेरिकाले पक्राउ आदेश जारी गरिएका अपराधीका रूपमा रहेका छन् भने निजलाई पक्राउ गर्न ५० लाख अमेरिकी डलरको पुरस्कार घोषणा गरिएको छ । कमान्डो फिर्ता हुनै लागेको समयमा उनीहरूको मोरो इस्लामिक लिबरेसन फ्रन्टसँग जम्काभेट भएको गृहमन्त्री रोक्सासले बताउनुभयो । फ्रन्टसँग करिब १० हजार लडाकू रहेका छन् र यो फिलिपिन्सको प्रमुख मुसलमान विद्रोही समूह हो । गत वर्ष मार्चमा यस समूहले सरकारसँग शान्ति सम्झौता गरेको थियो । फाइटर्स फ्रन्टबाट भिन्न भएको समूह हो र यसमा केही सय मुसलमान बन्दुकधारी रहेका छन् र उनीहरूले यस सम्झौतालाई स्वीकार गरेका छैनन् । राष्ट्रपति बेनिग्नो अक्विनोले यस घटनामा अनुसन्धान गर्न आदेश दिनुभएको छ । फ्रन्टले युद्धबिराम सम्झौताको व्यवस्था बमोजिम प्रहरीले उक्त कारवाहीको विषयमा समन्वय नगरेको आरोप लगाएको छ । गृहमन्त्री रोक्सासले यस घटनाले प्रभाव पार्ने भए पनि शान्ति वार्ता भङ्ग नहुने बताउनुभयो । उहाँले फाइटर्सका नेता बसित उस्मान भागेको बताउनुभयो । उस्मानमाथि हालै दक्षिणी भागमा भएको बम आक्रमणको आरोप लगाइएको छ । फ्रन्टका प्रमुख वार्ताकार मोहघर इक्बालले यो ठूलो समस्या हुने बताउनुभयो । फिलिपिन्स मुख्यतया क्याथोलिक मुलुक हो । यहाँ दक्षिणी प्रान्तहरूमा मुसलमान अल्पसङ्ख्यकका लागि स्वशासनको व्यवस्थाका लागि संसदमा हाल प्रस्तावित कानुनमा छलफल भइरहेको छ र फ्रन्टले यसैका लागि आफ्नो विद्रोह अन्त्य गरेको थियो । यसै वर्षको आरम्भदेखि विद्रोहीलाई निरस्त्र पार्ने काम आरम्भ हुने कार्यक्रम तय भएको थियो । इकबालले यो फ्रन्ट तथा सरकारी सेनाबीच यस वर्षको पहिलो भिडन्त भएको र यो नै अन्तिम हुने आशा व्यक्त गरे । उनले फ्रन्टले युद्धविरामलाई अझै मानेको उल्लेख गरे । विद्रोहीका उपाध्यक्ष गजली जाफरले गत मार्चमा हस्ताक्षर भएको शान्ति सम्झौता नै द्वन्द्वको समाधान भएको बताए । सरकारी शान्ति समूहका अध्यक्ष मिरियाम कोरोनेल फेरेरले एक विज्ञप्ति प्रकाशन गरी आइतबारको रक्तपात सुरक्षाको चुनौती भएको बताउँदै यसले वार्ताकारको दृढतालाई अझै बलियो बनाएको बताउनुभयो ।