देशमा १८ सय भन्दा बढीको ज्यान जानेगरी आएको भूकम्पमा परी राष्ट्रिय संकटको अवस्था उत्पन्न भएपछि विदेशमा रहेका नेपालीहरु सहयोगका लागि सक्रिय बन्न थालेका छन् । यसैक्रममा अष्ट्रेलियामा पनि गैरआवासीय नेपाली संघ राष्ट्रिय समन्वय परिषद्को आपतकालीन बैठक आज विहान बसेको छ । उक्त बैठकले एनआरएन अष्ट्रेलियाका अध्यक्ष महेन्द्र ओलीको नेतृत्वमा राष्ट्रिय आपतकालीन सहयोग समिति गठन गर्ने निर्णय गरेको छ । यस समितिमा अष्ट्रेलियामा रहेका सम्पूर्ण संघ संस्थाका अध्यक्ष सदस्य रहने छन् । त्यस्तै राजदूतावास र महावाणिज्यदूतावासका प्रतिनिधि पनि रहने भएका छन् ।
यसैगरी एनआरएन अष्ट्रेलियाले भूकम्प विज्ञहरु र नर्स डाक्टरहरुको एउटा टोली शिघ्र नेपाल पठाउने निर्णय समेत गरेको छ । जसको नेतृत्व एनआरएन ओसियाना क्षेत्रीय संयोजक विष्णु हमालले गर्नुहुने भएको छ । त्यस्तै यस राष्ट्रिय विपत्तिको समयमा आवश्यक पर्ने उद्धार सामग्री, लत्ता कपडा, टेन्ट आदिको जाहो गर्ने र त्यसलाई नेपालसम्म पुर्याउनका एनआरएन अष्ट्रेलियाका उपाध्यक्ष स्वतन्त्रप्रताप शाहको संयोजकत्वमा अर्को टिम निर्माण गरिएको छ । आपतकालीन समयमा उद्धार र राहतका निम्ति आर्थिक सहयोग संकलन गर्नका लागि एनआरएन अष्ट्रेलियाका पूर्वअध्यक्ष गोबा कटवालको नेतृत्वमा आर्थिक सहयोग र संकलन टोली निर्माण गरिएको छ । यसले अष्ट्रेलियाभर सहयोग गर्न चाहनेहरुबाट आर्थिक संकलन जुटाउनेछ । केन्द्रीकृत रुपमा आर्थिक संकलन अभियान चलाउने तयारी यसले गरेको संयोजक गोबा कटवालले एमएनटीभीलाई जानकारी गराउनुभयो ।
सहयोग रकम एनआरएन अष्ट्रेलियाको एकाउन्टमा रकम जम्मा गर्न सकिनेछ ।

BSB 032006

Acc # 595128

Westpac Bank

यसैबीच, एनआरएन अष्ट्रेलियाले आफ्नो कोषबाट तत्काल १० लाख रुपैयाँ भूकम्प पीडितको राहत र उद्धार कार्यका निम्ति प्रदान गर्ने निर्णय समेत गरेको छ । यस्तै न्यू साउथवेल्सका लागि अवैतनिक महावाणिज्यदूत दिपक खड्काको नेतृत्वमा अष्ट्रेलियन सरकार, यहाँका दातृ निकायहरु, खोज तथा उद्धार टोलीहरुसँग सम्पर्क र समन्वयका लागि पहल गरिने भएको छ ।