भक्तपुरबाट बिक्री गर्न भारत पु¥याइएकी सिन्धुपाल्चोक थाङ्पाल्कोट–२ की २१ वर्षीया सुनिता खत्रीको भक्तपुर प्रहरीले उद्धार गरी फिर्ता ल्याएको छ । भूकम्पले त्रसित भएका बेला भक्तपुरबाट गत जेठ १८ गते नुवाकोट जिल्ला शिखरबेँसी गाविस–९ का १७ वर्षीय सुमन तामाङले बिक्री गर्न भारत पु¥याएपछि प्रहरीले उद्धार गरी जेठ २६ गते भक्तपुर फर्काएको महानगरीय प्रहरी परिसर भक्तपुरका प्रहरी उपरीक्षक विकास श्रेष्ठले मंगलबार जानकारी दिनुभयो । भक्तपुरको व्याँसीस्थित प्राइम अफ्सेट प्रेसमा विगत दुई वर्षदेखि काम गर्दै आएकी खत्रीलाई एक महिनादेखि सोही प्रेसमा काम गर्न बसेका तामाङले प्रेम गर्छु भनी सम्बन्ध बढाएर बिहे गर्छु भन्दै घुमाउन लाने बहानामा भारत पु¥याएको अनुसन्धानबाट खुलेको उहाँले बताउनुभयो । नेपाल फर्काइएकी खत्रीले आफूसँग प्रेम गर्छु भनेर फकाई घुम्न जाने बहानामा उसले भारत पु¥याएको बताउनुभयो । उहाँका अनुसार अब विवाह गर्ने, पहिला कपडा किनेर घुम्न जाउँ भनेर एकरात काठमाडौँको होटलमा राखेपछि भोलिपल्ट कलङ्कीबाट बस चढेर चितवन लगेको र पछि घुम्न जाने भन्दै भारत पु¥याइयो । भारतको सीमामा पुगेपछि मामा भन्ने एक र अरूसहित गरेर चारजना एकै बसमा भारत लगेको बताउँदै खत्रीले भन्नुभयो–“भारत जान्नभन्दा बिहे गरेर भारतमै बस्ने, दुईवर्ष उतै काम गरेर फर्कौंला भन्यो, भोक लाग्यो भन्दा गाडीमा खानेकुरा ल्याइदिन्थ्यो, शौचालय जाँदा पनि मास्क लगाएर सलले अनुहार छोप्न लगाउँथ्यो ।” भारत पुगेपछि थप चारजनासहित आठजनाको घेराबन्दीमा परेकी उनलाई सिलिगुढी हुँदै मेघालयको सिलोङ लाडुङवाई तिनालीमा एक होटलमा पु¥याएपछि नेपाली भाषी सङ्गीता श्रेष्ठको सहयोगमा उनको उद्धार भएको प्रहरीको भनाइ छ । यहाँबाट एक नेपाली भाषी महिलालाई बुझाउने क्रममा खत्री जान नमानेपछि सङ्गीतासहितका स्थानीय नेपाली भाषीले सोधपुछ गरेर प्रहरीलाई खबर गर्ने भनेपछि सबै तत्काल फरार भएको अनुसन्धानबाट खुलेको प्रहरी उपरीक्षक श्रेष्ठले बताउनुभयो । खत्रीले दाजु भक्तपुर प्रहरी परिसरमा कार्यरत प्रहरी जवान नीरबहादुर खत्रीको बारेमा जानकारी दिएपछि सङ्गीताले फोन गरेर घटनाबारे जानकारी दिएर बहिनी लिन आउनु भन्ने खबर दिएपछि खत्रीसहित दुईजनाको टोली २३ गते भारत गएर उद्धार गरेर ल्याएको थियो । उद्धारमा संलग्न प्रहरी जवान खत्रीले सिलिगुढीमा सङ्गीता र अरू नेपाली भाषीको सहयोगमा बहिनीको उद्धार गर्न सहज भएको बताउनुभयो । फरार तामाङको भने नेपाल र भारतीय प्रहरीद्वारा खोजी भइरहेको प्रहरीले जनाएको छ ।