एकीकृत नेकपा (माओवादी)ले संविधान निर्माणमा देखिएका विवादित विषयमा असहमति राखेर नै भए पनि संविधान लेखन प्रक्रियालाई पूर्णता प्रदान गर्ने निर्णय गरेको छ । एमाओवादीको बसेको ‘वैचारिक बहस व्यवस्थापन समिति’को बैठकले यही असार १३ गतेभित्रै संविधान लेखन प्रक्रियामा देखिएका सबै विवादित विषयलाई टुङ्गो लगाएर अन्तिम मस्यौदा गर्न र संविधानसभामा पेस गर्न आफ्नो तर्फबाट सक्दो प्रयत्न गर्ने निर्णय गरेको प्रवक्ता दीनानाथ शर्माले जानकारी दिनुभयो । संविधानसभाबाटै संविधान निर्माण गर्ने पार्टीको पूर्वघोषित योजना रहेको भन्दै एमाओवादीले प्रमुख चार दलबीच भएको १६ बुँदे सहमति र विगतमा भएका सहमति र सम्झौताका आधारमा अगाडि बढ्नुपर्नेमा जोड दिएको छ । प्रवक्ता शर्माले बैठकमा मस्यौदा समितिमा रहनुभएका सभासद्हरूले हालसम्म भएको प्रगतिका बारेमा जानकारी गराउनुभएको बताउनुभयो । मुलुकको पछिल्लो राजनीतिक अवस्था, पुनःनिर्माणका लागि अन्तर्राष्ट्रिय सम्मेलनलगायतका विषयमा समेत बैठकमा छलफल भएको थियो । व्यवस्थापिका–संसद्को बैठक आह्वान भएको सन्दर्भमा सरकारले एकलौटी रुपमा विधि र प्रक्रियासमेत नपु¥याइकन पुनःनिर्माण प्राधिकरण गठन गरेको भन्दै आपत्ति प्रकट गरिएको थियो ।