ब्रिसबेनमा भविष्यको सपना देखेर पढ्न आएका चितवनका २१ वर्षीय युवा उज्वल पौडेल यतिबेला रगतसम्बन्धी क्यान्सर ल्युकेमियाका कारण जीवनसँग संघर्ष गरिरहेका छन् । एक वर्षअघि उनी अष्ट्रेलिया आएका हुन् । चितवनमा एउटा सामान्य परिवारका एक्ला छोरा उज्वललाई यतिबेला सहयोगको खाँचो छ । उनले सहयोगको लागि अपिल गरेको तीन महिनाको अवधिमा धेरै सहयोगी हात पनि पाएका छन् । तर, उनको बोनम्यारो ट्रान्सप्लान्टको लागि करिब एक लाख डलर खर्च लाग्ने भएका कारण सहयोग अभियानलाई लिएर यतिबेला ब्रिसबेनकै अर्का युवा विपिन कार्की अष्ट्रेलियाका विभिन्न शहरमा आइरहेका छन् । यतिबेला उनी सिड्नीमा छन् र मेलबर्न जाँदैछन् । कहिल्यै नचिनेको व्यक्तिसँग उनको एउटै नाता छ, “ऊ नेपाली हो” । उनी भन्छन् “उज्वल पनि म जस्तै विद्यार्थी हो । आज उसलाई समस्या परेको छ । भोलि मलाई पनि त पर्न सक्छ । यसैले उज्वललाई सहयोग गर्नुपर्छ ।” यतिबेला उज्वलको खानाबस्ने व्यवस्था ब्रिसबेनका सागर अर्यालले गरिरहनुभएको छ । ब्रिसबेनकै अभिनास श्रेष्ठको पनि यो अभियानमा धेरै योगदान रहेको छ । उज्वलको बोनम्यारो ट्रान्सप्लान्ट भारतमा गर्नका लागि त्यहाँ बुझ्ने काम पनि भइरहेको छ । नेपाली समूदायका साथै भारतीय समूदायले पनि उज्वलको सहयोगमा उल्लेख्य योगदान दिएका छन् । विभिन्न कार्यक्रमका उज्वल सहयोग अभियानका निम्ति उनीहरुले सहयोग संकलन गरेर साथ दिएका हुन् । जसका निम्ति प्रेरणा पौलले भारतीय समूदायबीच यो अभियानको नेतृत्व गरेकी छिन् । उनी पनि क्यान्सर रोगका कारण आफन्त गुमाएकाले उज्वललाई सहयोग गर्नुपर्छ भन्ने भावनाका साथ यो अभियानमा जुटेकी हुन् । उज्वललाई फेरि पनि युनिभर्सिटी गएको देख्ने अनि उज्वल भविष्यको सपना बुन्दै गरेर भेट्ने अभिलाषा लिएर धेरै सहयोगी हातहरु यसमा जोडिनुभएको छ । एमएनटीभीसँग कुरा गर्दै विपिनले भने, “मलाई मेरो कर्तव्य नै यही हो जस्तो लाग्छ । म मन्दिर नगएको धेरै भयो तर, यही नै धर्म हो जस्तो लाग्छ ।” यसअघि क्रिकेटर पृथु बास्कोटाको उपचारका बेला पनि उनी यसैगरी सक्रिय बनेका थिए । “सबैभन्दा ठूलो कुरा चाहीँ २१ वर्षको एउटा नेपाली, आपूmजस्तै पढ्न यहाँ आएको छ र अचानक यस्तो रोग लाग्छ जसले सारा सपना चकनाचुर हुन्छ । उसलाई हामीले सहयोग नगरे कसले गर्छ ?” विपिनले प्रश्न गरे । तपाईं पनि उज्वलको उपचारका लागि सहयोग गर्न सक्नुहुन्छ । Name:Ujwal Poudel BSB:064123, AC no:10242567, COMMON WEALTH BANK, AUS http://www.helpujwal.com/ Call – 0481462251 थप जानकारी यो भिडियोमा दिइएको छ ।