संविधानको चटारो रहेका बेला संविधान मस्यौदा समितिका सदस्य एवं काँग्रेस केन्द्रीय सदस्य शेखर कोइरालाको अगुवाईमा जनसम्पर्क समिति अष्ट्रेलियाको अधिवेशनमार्फत नयाँ नेतृत्व चयन गर्ने प्रयास असफल भएको छ । यद्यपि, केन्द्रीय प्रतिनिधिको निर्णय सबैले मान्ने भन्दै लेखेरै दिएका छन् । यसले अब विवाद समाधान हुने बाटोमा नरहे पनि नयाँ नेतृत्व भने आउने निश्चित भएको छ । अष्ट्रेलिया काँग्रेसका एक केन्द्रीय नेताले भने, केही दिनभित्रै नयाँ अध्यक्षको नाम केन्द्रबाट आउनेछ । यसपछि अध्यक्षले नै थप समितिको पूर्णताको लागि पहल गर्नेछन् । अर्कोतर्फ, नेपाली काँग्रेस केन्द्रीय कार्यालयले निर्वाचन गर्नका निम्ति भन्दै संयोजक तोकेका प्रेम सापकोटा अधिवेशनको प्रक्रिया सुरु भएपनि अन्त्य नभएको बताउँछन् । उनी भन्छन्, “सबैलाई मिलाउने प्रयासका कारण नै यस्तो भएको हो । अन्यथा अधिवेशन सुरु भइसकेको र बन्दसत्रमा पनि छलफल गरिसकेका अवस्थामा निर्वाचन गर्न निर्वाचन समितिलाई कुनै कठिनाई छैन ।”
यतिबेला नेपाली काँग्रेसको प्रवासी भ्रातृ संगठन जनसम्पर्क समिति अष्ट्रेलियाको नेतृत्वको दाबी ५ जनाले गरिरहेका छन् । यसरी दाबी गर्नेहरुमा सन्तोष सिटौला, सुरेश गुरुंग, दिनेश जोशी, रमेश जोशी र अर्जुन केसी रहेका छन् । केन्द्रीय प्रतिनिधि नेता डा. शेखर कोइरालाले यी पाँचैजनासँग अलग अलग वार्ता गरेका थिए । जसमा सिटौलाले आपूmलाई असहयोग गरिएको र बदनाम गर्ने प्रयास भएका कारण अर्को एक कार्यकाल नेतृत्व गर्न पाउनुपर्ने जिकिर गरेका थिए भने रमेश जोशीले सबैलाई मिलाएर लैजाने र निर्विवाद व्यक्ति भएका कारण आपूmलाई नेतृत्व दिन आग्रह गरेका थिए । सिड्नी बाहिरबाट नेतृत्व आउँदा त्यसले सकारात्मक सन्देश जाने समेत जोशीको तर्क थियो । उनले एमएनटीभीसँग कुरा गर्दै भने, “मैले केन्द्रको कुनैपनि निर्णय स्वीकार्य हुनेछ भनेको छु । तर, कार्यकर्ताको भावनामा कुठाराघात नहोस् भन्ने कुरा पनि राखेको छु ।”
जनसम्पर्क समितिका अध्यक्ष सन्तोष सिटौला केही दिनमै केन्द्रले यो विवादको अन्त्य गर्दै नयाँ कार्यकालको लागि नेतृत्वको टुंगो लगाउने बताउँछन् । उनी भन्छन्, “अथवा, केन्द्रले निर्वाचन गर्नका निम्ति स्वीकृति दिनेछ । जस अनुसार सबै सदस्यहरुको सहभागितामा निर्वाचनको मिति तोकिनेछ ।”
विवाद समाधान भएको देखिए पनि भित्रभित्रै भुसमा आगो रहेझैंको अवस्थामा काँग्रेसको अष्ट्रेलियाका नेताहरु रहेका छन् । एकले अर्कालाई निषेध गर्दा अहिलेको परिस्थिति आएको विश्लेषण गर्न सकिन्छ । केन्द्रले दिएको निर्णयलाई नमान्ने आँट कुनैपनि नेतामा छैन । यद्यपि, आपूmलाई निस्क्रिय तुल्याएर फेरि पनि केन्द्रले दिने नयाँ नेतृत्वलाई असफल पार्ने काम हुने भने पक्का देखिएको समाचारश्रोतले जनाएको छ । नेपाली काँग्रेसको केन्द्रीय कार्यालयमा छलफल पश्चात तोकिने नेतृत्व यी पाँचैजना प्रत्यासीभन्दा बाहिर हुनसक्ने पनि अनुमान एकथरीले गरेका छन् । आर्थिक अनियमितताको आरोप एकपक्षले वर्तमान अध्यक्षमाथि लगाइरहेको छ भने अर्कोतर्फ, क्रियाशील सदस्यताको विषयमा पनि विवाद रहेको छ ।