संयुक्त राष्ट्रसङ्घले अन्तर्राष्ट्रिय समुदायबाट पर्याप्त रकम प्राप्त नहुँदा भूकम्प अतिप्रभावित नेपालका विभिन्न जिल्लामा सञ्चालित मानवीय सहायताका कार्यक्रम निर्धारित योजना अगावै स्थगन हुनसक्ने जनाएको छ । संयुक्त राष्ट्रसङ्घले बैंकक र काठमाडौँबाट एकैपटक एक विज्ञप्ति जारी गरी स्थलमार्गबाट मानवीय सहायताका सामग्री ढुवानी गर्न नसकिने स्थानमा प्रयोग हुँदै आएका हेलिकप्टर पर्याप्त रकम अभावमा निर्धारित योजना अगावै स्थगन हुनसक्ने जनाएको हो । सडकबाट पुग्न नसकिने १३९ समुदायमा हेलिकप्टरका माध्यमबाट सहायता सामग्री पु¥याइएको तथा हेलिकप्टरबाट सहायता सामग्री ढुवानी गर्न तथा मानवीय सेवालाई निरन्तरता दिन थप रु एक अर्ब ८० करोड आवश्यक भएको विज्ञप्तिमा उल्लेख गरिएको छ । हालसम्म रु ८८ करोडमात्र प्राप्त भएको उल्लेख गर्दै विज्ञप्तिमा शीघ्र आवश्यक रकम उपलब्ध नभएमा आगामी भदौ १५ गतेदेखि अत्यावश्यक सामग्री भूकम्पपीडितसमक्ष पु¥याउन नसकिने स्पष्ट गरिएको छ । छ सय ५० मेट्रिक टनभन्दा बढी सामग्री विकट भेगमा ढुवानी गर्न बाँकी रहेको तथा थप ३५ वटा संस्थाले आफूसँग रहेका राहत सामग्री ढुवानीका निम्ति राष्ट्रसङ्घीय मानवीय सहायताकर्मीलाई आग्रह गरिरहेका विज्ञप्तिमा जनाइएको छ । “तत्काल सहायता रकम उपलब्ध नभएमा एक लाख ४६ हजार भूकम्पपीडित अत्यावश्यक सहायता सामग्रीबाट वञ्चित हुने तथा जारी बर्खायाम र त्यसपछिका दिन उनीहरूका निम्ति अत्यन्त कष्टकर हुने” भन्दै विज्ञप्तिमा सहायताका लागि अपिल गरिएको छ ।