दुर्गिस फिल्मसको व्यानरमा बनेको ‘होस्टेल रिटर्नस’ यो शनिबार र आइतबार सिड्नीमा प्रदर्शन हुने भएको छ । सिभिक थियटरमा हुने प्रदर्शनको तयारी सम्पन्न भएको छ भने यस चलचित्रलाई युवापुस्ताको चलचित्रका रुपमा प्रतिक्षा गरिएको छ । शनिबार दुईवटा शो राखिएको छ भने आइतबार एउटा शो गरिने भएको छ । नेपालको बुटवलमा छायांकन गरिएको फिल्म सुरज भुषाल निर्देशित हो । यसमा छात्रावासको जीवनशैली र त्यहाँ बसोबास गर्ने विद्यार्थीबीचको अन्तद्र्वन्द्वको कथा प्रस्तुत गरेको छ । शनिबार दिउँसो दुईबजे र साँझ ५ बजे दुईवटा शो र आइतबार साँझ ६ बजेपछि अर्को शोमा चलचित्र प्रदर्शन गरिने अष्ट्रेलियामा वितरण व्यवस्था मिलाएको कम्पनीले जनाएको छ । फिल्ममा सुशिल श्रेष्ठ, नाजिर हुसेन, सुशिल सिटौला, अभय बराल, शशी श्रेष्ठ, स्वस्तीमा खड्का, सुदाम सिके, प्रदीप चौधरी, रोयदीप श्रेष्ठ, इभम जोशी, निर्मल शर्मा, दीया मास्के र निर्माता रावलको अभिनय हेर्न पाइनेछ । स्वप्नील आचार्यको संगीत रहेको फिल्ममा अष्ट महर्जनको द्वन्द्व, गोविन्द राईको नृत्य, सुरज भुषाल र सन्तोष लम्सालको पटकथा तथा हरि हुमागाईको छायांकन रहेको छ ।