नेपालीको सञ्चालनमा रहेको सिड्नीको हाम्रो कलेजले आफ्ना उत्कृष्ट छात्रछात्रालाई विशेष समारोह गरेर एवार्ड र पुरस्कार वितरण सम्पन्न गरेको छ । सन् २०१४ र १५ मा पास भएका उत्कृष्ट विद्यार्थीलाई पुरस्कार प्रमाणपत्र दिँदै कलेजले सम्मान गरेको हो । सन् २०१३ को जुलाईदेखि हाम्रो कलेजले भोकेशनल एजुकेशन एण्ड ट्रेनिंग (भेट) कोर्सहरु सञ्चालन गरिरहेको छ भने नोभेम्बर २०१३ देखि उसले विजनेस र एकाउन्टमा एडभान्स डिप्लोमा कोर्स सञ्चालन गरेको छ । समारोहको सुरुमा कलेजका प्रमुख कार्यकारी अधिकृत दिपक खनालले सबैलाई स्वागत गर्दै दुई वर्षमा कलेजले गरेको कार्यहरु, उपलब्धीको चर्चा गरेका थिए । शैक्षिक गुणस्तर र मापदण्ड पालनाप्रति सदैव हाम्रो कलेज सचेत रहेको भन्दै यसै कारण सरकारले स्ट्रीमलाईन भिसा प्रोसेसिंगको लागि अनुमति दिएको खनालको भनाई छ । कार्यक्रममा बोल्दै कलेजका निर्देशक डा. जगदिश तिम्सिनाले विभिन्न विधामा पुरस्कृत भएका विद्यार्थीहरुलाई बधाई दिँदै गुणस्तरमा कुनै सम्झौता नगर्ने प्रतिबद्धता जनाएका थिए । विद्यार्थीहरुले हाम्रो कलेजमा पढ्दाका अनुभव साटासाट गरेका थिए ।