पाकिस्तानी प्रधानमन्त्री नवाज शरिफले पाकिस्तानमा कायम रहेको अनर किलिङ (सामाजिक प्रतिष्ठासँग जोडेर प्रायः महिलालाई दिइने मृत्युदण्ड) को कुसंस्कारको अन्त्य गर्ने प्रण गर्नुभएको छ । यस्तै अनर किलिङसँग सम्बन्धित एक डकुमेन्ट्री ‘अ गर्ल इन्न द रिभर द प्राइस अफ फर्गिभनेस’ का निर्देशक सर्मिन अबिदचिन्नोएलाई सो डकुमेन्ट्री ओस्कारमा मनोनयन भएकोमा बधाई दिँदै सो प्रण गर्नुभएको हो । छोटा चलचित्रअन्तर्गत सो डकुमेन्ट्री मनोनयनमा परेको बताइएको छ । सो फिल्म यस्तै अनर किलिङ्को कारबाही पाएकी एक बालिका भाग्यबस बाँचेको कथामा आधारित छ । पाकिस्तानमा हरेक वर्ष परिवारको प्रतिष्ठामा आँच आएको निहुमा सयौँ महिलालाई हत्या गर्ने गरिएको छ । समाजमा प्रतिष्ठा राख्ने नाममा महिलाका आफन्तले उनीहरुको हत्या गर्ने गर्छन् । तर त्यसलाई इस्लामको धर्मसँग जोडेर सरकारले पनि यसरी कारबाही गर्ने व्यक्तिलाई कारबाही गर्न सकेको देखिँदैन । प्रधानमन्त्री शरिफले यस्तो प्रकृतिको कुसंस्कारको अन्त्य गरिने र यसका लागि आवश्यक परेमा कानुन ल्याइने जानकारी पनि दिनुभएको बताइएकोछ । प्रधानमन्त्रीको कार्यालायद्वारा शुक्रबार प्रकाशित विज्ञप्तिमा उहाँले यस्तो कुसंस्कारको अन्त्यका लागि प्रतिबद्धता जाहेर गर्नुभएको बताइएको छ ।