सहारा क्लबको आयोजना तथा हिमश्री फुड्स प्रालिको मूख्य प्रायोजनमा यही माघ ५ गतेदेखि १६ गतेसम्म पोखरा रङ्गशालामा सञ्चालन गरिने १४औँ आहा–रारा गोल्ड कप फुटबल प्रतियोगिताको सम्पूर्ण तयारी पूरा भएको छ । ‘खेलकुदको विकासमा सहकार्य गरौँ, पोखरालाई खेलकुद पर्यटन सहरका रुपमा स्थापित गरौैँ’ भन्ने मूलनाराका साथ आयोजना गरिन लागिएको सो प्रतियोगितामा तीन विदेशीसहित १२ टोलीको सहभागिता रहने क्लबद्वारा आज यहाँ आयोजित पत्रकारसम्मेलनमा जानकारी दिइयो । प्रतियोगिताको विजेता टोलीलाई रु पांच लाख एक हजार एक रुपैयाँ र उपविजेता टोलीलाई रु दुई लाख ५१ हजार एक रुपैयाँ दिइने क्लबका अध्यक्ष वीरभद्र आचार्यले बताउनुभयो । प्रतियोगिताका सर्वोत्कृष्ट खेलाडीलाई एक थान हिरो स्कुटर, सर्वाधिक गोलकर्तालाई रु २५ हजार, प्रतियोगिता अवधिमा टिकट काटी अवलोकन गर्ने दर्शकमध्ये एकजनालाई गोला प्रथाबाट एक तोला सुनको सिक्का र एलजी टिभीसमेत दिइनेछ । प्रतियोगिताबाट बचत हुने रकम क्लबद्वारा सञ्चालित १६ जिल्लाका गरिब, असहाय र कठिन अवस्थाका २६ जना बालकको भरणपोषण तथा शिक्षादीक्षामा खर्च गरिनेछ । प्रतियोगितामा रु ९९ लाख ९२ हजार आम्दानी हुने र रु ७९ लाख ६२ हजार ३०० खर्च हुने अनुमान गरिएको छ । क्लबका अध्यक्ष वीरभद्र आचार्यको अध्यक्षतामा भएको सो कार्यक्रममा हिमश्री फुड्स प्रालिका कार्यकारी अध्यक्ष सूर्यबहादुर केसी, प्रतियोगिता मूल आयोजना समितिका सदस्यसचिव केशवराज बराल, क्षेत्रीय खेलकुद विकास समितिका अध्यक्ष खगराज पौडेल लगायतका वक्ताले मन्तव्य व्यक्त गर्नुभएको थियो ।