पर्थमा सञ्चालन गरिएको नेप्लीज एशोसिएसन अफ वेष्टर्न अष्ट्रेलिया नावा कपको उपाधि नेपाली वारियर्सले जितेको छ । कूल ४ टिम सहभागी रहेको प्रतियोगिता वीस वीस ओभरमा खेलाइएको थियो । खेलमा नेपाली वारियर्सले अस नेपाललाई पराजित गरी फाईनलमा पुगेको थियो भने रोयल नेपाल क्रिकेट टिमलाई पराजित गरी पर्थ नेपाल पनि फाईनलमा नेपाली वारियर्ससँग भिड्न तयार भएको थियो । आइतबार भएको फाईनल खेलमा टस जितेर पर्थ नेपालले पहिले व्याटिंग रोजेको थियो । उसले ९५ रनको लक्ष्य विपक्षीलाई दिएको थियो । यसको प्रत्युत्तरमा नेपाली वारियर्सले लक्ष्य ५ विकेटको क्षतिमा २ बल बाँकी छँदै चुमेको थियो । खेलमा म्यान अफ द सिरिज नेपाली वारियर्सका कप्तान दिपक बस्नेत भएका छन् भने म्यान अफ द म्याच रोनाल्ड डल्लाकोटी भएको नमस्ते नेपालले जनाएको छ ।