अष्ट्रेलियाको मेलबर्नमा सञ्चालित प्रतिष्ठित एमआईटी फुटबल प्रतियोगिताको २०१६ को संस्करण अल्बरी थ्रीस्टार फुटबल क्लबले जितेको छ । फाईनल प्रतिस्पर्धामा युनाईटेड फुटबल क्लबलाई पराजित गर्दै उसले उपाधिमाथि कब्जा जमाएको हो । प्रतियोगिताकै फरएभर योंग विधातर्फ (३५ वर्ष माथि) माछापुच्छ्रे क्लबले उपाधि जितेको छ भने उसले फाईनलमा सेन्ट जर्ज फ्रेण्डस् फुटबल क्लबलाई पराजित गरेको थियो । अष्ट्रेलियाको मेलबर्न, सिड्नीसहितका शहरमा रहेका फुटबल टोलीहरुको सहभागिता रहेको प्रतियोगिताको फाईनलसँगै उनीहरुलाई मेडल, प्रशंसापत्र र शिल्ड प्रदान गरिएको थियो । कार्यक्रममा भिक्टोरियाका लागि अवैतनिक महावाणिज्यदूत चन्द्र योञ्जन, एनआरएनका अध्यक्ष शेष घले, जोग लिम्बु, बम योञ्जन लगायत स्थानीय काउन्सिलका प्रतिनिधिहरु अतिथिको रुपमा हुनुहुन्थ्यो । मेलबर्नको यति फुटबल क्लबले विगत ६ वर्षदेखि प्रतियोगिताको आयोजना गर्दै आएको छ ।