अमेरिकाले सिरियाको स्थिति नियन्त्रण बाहिर गएको भन्दै चिन्ता ब्यक्त गरेको छ । जेनेभामा रहनुभएका अमेरिकी विदेश मन्त्री जोन केरीले सिरियाको स्थिति नाजुक बन्दै गएको भन्दै तत्काल ठोस कदम चाल्न विश्व समुदायको ध्यानाकर्षण गराउनुभएको हो ।

संयुक्त राष्ट्रसंघ र अरब लिगका प्रतिनिधीसँग भेट गर्दै विदेश मन्त्री केरीले सिरियामा हजारौं जनता भोकमरीको शिकार भएको, संघर्षका कारण घाइते भएकाहरुको अवस्था नाजुक रहेको र ब्यापार ब्यवसाय ठप्प रहेकाले तत्काल ठोस कदम चाल्न अपील समेत गर्नुभएको हो ।

एलोप्पो शहरमा जारी संघर्ष अन्त्यका लागि प्रयास जारी छ । यो शहरमा ९ दिनमा मात्रै २ सय ५० जना मारिएका छन् । सिरियाको शान्ति वार्ताबारे छलफल गर्न राष्ट्रसंघलगायत अरब लिगका प्रतिनिधीहरु जेनेभामा भेला भएका छन् । शान्ति सफल हुने सम्भावना भने कम रहेको जनाइएको छ ।