लागू औषध खैरो हेरोइनसहित तीन जना पूर्वलडाकु पक्राउ
लागुऔषध खैरो हेरोइनसहित प्रहरीले तीन जना पूर्व लडाकुलाई पक्राउ गरेको छ ।
महानगरीय प्रहरी बृत बालाजुबाट खटिएको टोलीले माछापोखरीबाट रुकुम र रोल्पा घर भएका पूर्व लडाकुहरुलाई पक्राउ गरेको हो ।
रुकुम चुनुवाङका जगत पुन, रोल्पा कोटगाउँका अक्तबहादुर घर्तीमगर र रोल्पा गैरीगाउँका प्रवेश डि.सी. ब्राउन सुगरसहित पक्राउ परेको बालाजु प्रहरीले जनाएको छ । पक्राउ परेकाहरुको साथबाट ६८ ग्राम खैरो हेरोइन बरामद भएको प्रहरीले जनाएको छ ।
२८ वर्षीय जगत पुन सेना समायोजनताका ५ लाख रुपैयाँ बुझेर स्वेच्छिक अवकाश लिएका पूर्वलडाकु भएको प्रहरी अनुसन्धानबाट खुलेको छ । पक्राउ परेका अन्य पनि पूर्व लडाकु हुन् तर उनीहरुले सेना समायोजन भन्दा अघि नै माओवादी छाडेको बताइएको छ ।
