एनआरएन अष्ट्रेलियाले विराटनगरमा निर्माण गर्न लागेको पाथीभरा जेष्ठ नागरिक श्रद्धाश्रमको लागि न्यू साउथवेल्सका लागि अवैतनिक महावाणिज्यदूत दिपक खड्काले १० लाख सहयोग गर्नुहुनेभएको छ ।
आइतबार परोपकारी श्रद्धाश्रम निर्माण समितिका पदाधिकारीहरुसँगको छलफलमा खड्काले उक्त प्रतिबद्धता जनाउनुभएको हो । कल्याणकारी परियोजना संयोजक रमेश पाण्डेका अनुसार खड्काले भवन निर्माणका लागि १० लाख सहयोग गर्ने प्रतिबद्धता जनाउनुभएको हो ।

महावाणिज्यदूत खड्का सिड्नीको स्थापित व्यवसायी हुनुहुन्छ । यसका साथै, नेपाली समूदायलाई आइपर्ने विभिन्न अवसरहरुमा उहाँले सहयोग गर्दै आउनुभएको छ । सिड्नीमा क्राउन ईन्ष्टिच्युट अफ विजनेस एण्ड टेक्नोलोजी सञ्चालन गर्नुहुने खड्काले नेपालमा पनि शिक्षा र स्वास्थ्य क्षेत्रकै लागि सहयोग गर्दै आउनुभएको छ । नेपालमा दोलखा घर भई हंगकंग हुँदै अष्ट्रेलियाको भूमिमा यतिबेला स्थापित व्यवसायीको छवि बनाउनुभएका खड्का अवैतनिक महावाणिज्यदूतको रुपमा न्यूसाउथवैल्समा नेपालीले आयोजना गर्ने हरेकजसो कार्यक्रममा उपस्थित हुनुहुन्छ । एमएनटीभीसँगको कुराकानीमा उहाँले भन्नुभयो, “खासै यो सबैलाई बताउनुपर्ने विषय त होइन ।

तर, पीडामा रहेका नेपालका जेष्ठ नागरिकहरुको सेवा गर्ने पवित्र भावले जुन परियोजना अघि बढिरहेको छ त्यसमा एउटा ईंटा थप्ने अवसर पाएकोमा म खुशी छु । हामी सबैले मिलेर यो अभियानलाई सफल बनाउनु पर्दछ भन्ने मेरो विचार छ ।”

एनआरएन अष्ट्रेलियाले सन् २०१४ बाट थालेको यो परियोजनामा भूकम्प र नाकाबन्दीका कारण केही सुस्तता आएपनि अब छिटो सम्पन्न गर्नका लागि सहयोग पुर्याउन एनआरएनले अष्ट्रेलियाका विभिन्न राज्यहरुमा रहेका नेपालीहरुलाई आह्वान गरेको छ । यसअघि विराटनगर घर भई हाल सिड्नी निवासी मुकेश रेग्मीले पनि ११ लाख सहयोग गर्नुभएको थियो । रेग्मी रकडेलमा मम हाउसको सञ्चालक हुनुहुन्छ । यससँगै हाउसकिपिंग र क्लिनिंग कम्पनी पनि सञ्चालन गर्नुहुन्छ । १० लाख वा त्यसभन्दा बढी सहयोग गर्ने व्यक्तिको नाममा श्रद्धाश्रमको एउटा कोठाको नामाकरण गरिनेछ ।