पानामालाई हराउँदै चिली कोपा अमेरिका फुटबल प्रतियोगिताको क्वाटरफाईनलमा प्रवेश गरेको छ ।

अमेरिकामा जारी प्रतियोगिताअन्तर्गत समुह डि को खेलमा चिलीले पानामालाई ४–२ ले हरायो । खेलमा चिलीलाई विजयी गराउन ईडुवार्डो भार्गास र अलेक्सिस सान्चेजले दुई–दुई गोल गरे । पराजित टोली पानामाका लागि मिग्वेल कामार्गो र अब्देल अरोयोले एक एक गोल गरे । जीतसँगै चिलीले ३ खेलबाट ६ अंक जोड्दै क्वाटरफाईनलमा ठाँउ सुरक्षित गरेको छ ।

कोपा अमेरिकाअन्तर्गत समुह डि को अन्तिम लिगमा अर्जेन्टिनाले बोलिभियालाई ३–० ले हराएको छ । अर्जेन्टिनाले खेलको पहिलो हाफमै ३ गोल गरेको हो । अर्जेन्टिनाका लागि एरिक लामेला, एजिक्वेल लाभेजी र लियान्द्रो कुएष्टाले एक–एक गोल गरे । समुहका सुरुवाती दुई खेल जित्दै क्वाटरफाइनलमा पुगिसकेको अर्जेन्टिना आजको जितपछि ९ अंकका साथ समुह विजेता बन्यो ।