रौतहटको चुरे फेदीस्थित जंगलमा शनिबार आठ वटा गोली लागेर गम्भीर घाइते अवस्थामा रहेको गैंडा फेला परेको छ ।

चन्द्रपुर नगरपालिका–२ गैंडाटारको तिलेश्वर सामुदायिक वनको चाँदी खोला किनारमा शनिबार बिहान गोली लागेर गम्भीर घाइते अवस्थामा गैंडा फेला परेको हो ।

स्थानीय जंगलमा च्याउ टिप्न जाँदा नजिकैको झाडीबाट अवाज आएपछि हेर्न जाँदा घाइते अवस्थाको गैंडालाई देखेर प्रहरी र वन कर्मचारीलाई खबर गरेका थिए ।

घटनास्थलमा पुगेको प्रहरी तथा वन कर्मचारीको संयुक्त टोलीले गैंडाको टाउको र खुट्टामा ८ वटा गोली लागेको जानकारी दिएको छ ।

इलाका प्रहरी कार्यालय चन्द्रपुरले खाग तस्करहरुले गोली हानेको हुनसक्ने जनाएको छ । गैंडाको उपचारका लागि पर्सा वन्यजन्तु आरक्ष तथा चितवन निकुञ्जबाट मेडिकल टोली बोलाइएको छ ।