अमेरिकी राष्ट्रपति पदका रिपब्लिकन उम्मेदवार डोनाल्ड ट्रम्पलाई चुनावी अभियानका लागि राहत मिलेको छ ।

उम्मेदवारीका लागि उहाँसँगै प्रतिस्पर्धामा रहेर बाहिरिएका टेड क्रूजले ट्रम्पलाई समर्थन गरेपछि केही राहत मिलेको हो । आफ्नो अभिव्यक्ति शैलीका कारण पार्टीभित्रै वरिष्ठ नेताबाट समेत आलोचित बनिरहेका ट्रम्पका लागि क्रूजको समर्थन थोरै भए पनि राहत बनेर आएको हो ।

टेक्ससका सिनेटर टेड क्रूजले फेसबुकमार्फत् समर्थन दिने घोषणा गर्नुभएको हो । निकै लामो सोचविचार र विवेकसमेतलाई ख्याल गरी ट्रम्पलाई भोट दिने निर्णयमा पुगेको क्रूजले जनाउनुभएको छ ।

हिलारी क्लिन्टनलाई राष्ट्रपतिका रुपमा आफूले देख्न नचाहेकाले पनि ट्रम्पलाई भोट दिनुको विकल्प आफूसँग नरहेको उहाँले उल्लेख गर्नुभएको छ । अमेरिकामा आगामी नोभेम्बरमा निर्वाचन गरिँदैछ ।