सरकार र वामपन्थी विद्रोही फार्क समूहबीच हालै गरिएको शान्ति सम्झौता कोलम्बियाका जनताले अस्विकार गरिदिएका छन् ।

सरकार र विद्रोही फार्कबीच गत हप्ता सम्पन्न ऐतिहासिक शान्ति सम्झौता अनुमोदनका लागि जनमत संग्रह गरिएकामा त्यहाँका ५० दशमलव २४ प्रतिशतले त्यसलाई अस्वीकार गरिदिएका हुन् ।

विश्वलाई नै झट्का लाग्ने त्यहाँका जनताको फैसलाका कारण वर्षौं र लामो प्रयासपछि गरिएको युद्धविराम सम्झौता संकटमा पर्ने भएको छ ।

राष्ट्रको जीवनकै लागि निकै महत्वपूर्ण मानिएको सरकार र विद्रोही फार्कबीच सम्पन्न शान्ति सम्झौतालाई जनमत संग्रहमार्फत मतदाताले अस्विकार गरेका हुन् ।

चार वर्ष लामो शान्ति वार्तापछि गत हप्ता मात्र राष्ट्रपति जुआन मानुअल सान्तोस र फार्क नेता तिमोलीओन जीमेनेजबीच ऐतिहासिक शान्ति सम्झौतामा हस्ताक्षर गरिएको थियो ।

तर यो सम्झौता कार्यान्वयनका लागि जनमत संग्रहबाट अनुमोदन गर्नुपर्ने व्यवस्था गरिएकाले जनताका बीचमा लग्दा असन्तुष्ट मतदाताको झिनो संख्याले अस्वीकार गरेपछि शान्ति सम्झौता नै संकटमा पर्ने हो कि भन्ने आशंका बढेको छ ।

फार्क विद्रोही राजनीतिको मूलधारमा आउन ५२ वर्ष लामो सशस्त्र हिंसा त्याग्न तयार भएको थियो ।

साँढे दुई लाखभन्दा बढी जनता मारिएको यति लामो युद्ध अन्त्य गर्दै शान्तिको मार्गमा मुलुकलाई लैजानुको अर्को विकल्प नरहेको राष्ट्रपतिले बताए पनि जनताले यसलाई अस्विकार गरिदिएका छन् ।