अमेरिकी राष्ट्रपति निर्वाचनमा रिपब्लिकन उम्मेदवार डोनाल्ड ट्रम्पले ११ वर्ष अघि महिलाविरुद्ध आपत्तिजनक अभिव्यक्ति दिएकोमा माफी मागे पनि एकपछि अर्को गर्दै आफ्नै पार्टीका वरिष्ठहरुको साथ गुमाउन थाल्नुभएको छ ।

गत निर्वाचनमा राष्ट्रपति पदका रिपब्लिकन उम्मेदवार जोन मेक्कन र पूर्व विदेश मन्त्री कन्डोलिजा राइसले ट्रम्पले अति गरेको भन्दै समर्थन गर्न नसक्ने प्रष्ट गर्नुभएको हो ।

शुरुमा शर्तसहितको समर्थन दिएका मेक्कनले अब समर्थन कायम राख्न नसक्ने प्रष्ट गर्नुभएको छ । राइसले ट्रम्प कुनै हालतमा राष्ट्रपति बन्नु हुँदैन र उम्मेदवारी त्याग्नुपर्छ भन्नुभएको छ ।

न्यूह्याम्सपाएरका सीनेटर केली अयोट्टेले महिलाविरुद्ध तथानाम बोल्नेलाई समर्थन गर्न नसक्ने भन्दै हिलारी क्लिन्टनलाई पनि आफूले भोट नदिने बताउनुभयो । यता ट्रम्पले भने आफूलाई चुनावी मैदानबाट धकेल्न सञ्चारमाध्यम र पार्टीकै केहीले लगातार आक्रमण गरिरहेको आरोप लगाउँदै कुनै हालतमा चुनावी मैदानबाट नहट्ने अडान लिनुभएको छ ।

केही दिनअघि सार्वजनिक सन् २००५ को एक भिडियोमा ट्रम्पले आफु प्रसिद्ध मानिस भएपछि महिलासँग जे गर्न पनि सकिनेबारे कुरा गर्नु भएको थियो ।