नेपाल प्रहरीको केन्द्रीय अनुसन्धान ब्युरोले एटिएम कार्डबाट डाटा तथा पिन चोरी गरी अनधिकृत रुपमा रकम निकाल्ने तीन रोमानियाका नागरिकलाई पक्राउ गरेको छ ।

ब्युरोबाट खटिएको टोलीले काठमाडौंको दरबारमार्ग, ठमेललगायतका स्थानबाट हिडन क्यामरा प्रयोग गरी रकम निकालेको अभियोगमा शुक्रबार घिता हुजुम, ओसिप मोरारु र एलेक्स क्रिष्टियन बुगाहिरुलानलाई पक्राउ गरी सोमबार सार्वजनिक गरेको हो ।

प्रहरीले अभियुक्तहरुका साथबाट ३ लाख ८ हजार ५०० नेपाली र १० हजार ९ सय ५ युरो, ४ सय ७० फिलिपिनो मुद्रा, ३ सय ५३ थान एटिएम कार्ड, मोबाइल फोन छ थान, ल्यापटप दुई थानलगायतका सामग्री बरामद गरेको छ ।

पछिल्लो समय नेपालमा बुल्गेरिया, टर्की, रोमानियालगायत देशका नागरिक पर्यटक भिसा बनाएर नेपाल आई विभिन्न बैंकको एटिएममा पसेर रकम चोर्ने गरेका ब्युरोले जनाएको छ ।

यसअघि काठमाडौँ उपत्यकाका विभिन्न स्थानबाट २०७१ साल मंसिरमा २६ लाख नेपाली रुपैयाँसहित टर्कीका नागरिक, सोही वर्ष चैतमा १८ लाख नेपाली रुपैयाँसहित बुल्गेरियाका नागरिक, २०७३ साउनमा दुई लाख ६४ हजार नेपाली रुपैयाँसहित रोमानियाका नागरिक पक्राउ परेका थिए ।