मनाङ मस्र्याङ्दी क्लब झापाको सुरुङ्गामा जारी सहारा सुरुङ्गा गोल्डकप फुटबल प्रतियोगिताको सेमिफाइनलमा प्रवेश गरेको छ । सोसँगै सेमिफाइनलमा समीकरण पूरा भएको छ ।

मंगलबार भएको खेलमा मनाङले सीएमजी संकटा क्लबलाई १–० गोलअन्तरले पराजित गर्दै सेमिफाइनलमा प्रवेश गरेको हो । पहिलो हाफ गोलरहीत बराबरीमा टुंगिएको प्रतिस्पर्धात्मक खेलको दोस्रो हाफको ७ औं मिनेटमा मनाङका विदेशी खेलाडी ओलावालेले गरेको गोल नै निर्णायक बन्यो ।

प्रतियोगिताअन्तर्गत मंगलबारको खेलको म्यान अफ द म्याचमा मनाङका हेमन गुरुङ घोषित भए । उनले मेची मोबाइलको तर्फबाट १६ हजार रुपैयाँ बराबरको मोबाइल पाए ।

प्रतियोगिताअन्तर्गत बुधबार हुने पहिलो सेमिफाइनलमा विभागीय टिमहरु नेपाल पुलिस क्लब र एपीएफ भिड्ने छन् ।