एनआरएन अष्ट्रेलिया, विभिन्न नेपाली सामूदायिक संघसंस्थाको आयोजनाका साथै दूतावास, वाणिज्यदुतको कार्यालय, नेपाल पर्यटन बोर्ड समेतका सहभागितामा गर्न लागेको सिड्नीको नेपाल फेष्टिभलमाअभिभावकहरुको लागि विशेष व्यवस्था गरिने भएको छ । एनआरएन अष्ट्रेलियाले दिएको जानकारी अनुसार नेपालबाट आफन्तजन भेट्न आउनुभएका अभिभावकहरुलाई दिउँसो १२ः३० बजेदेखि २ः३० बजेसम्म निःशुल्क लञ्च प्याकेटको व्यवस्था गरिनेछ । एनआरएन अष्ट्रेलियाका उपाध्यक्ष एवं न्यूसाउथवेल्स संयोजक दिनेश पोखरेलका अनुसार महोत्सवमा सहभागी हुने अभिभावकहरुलाई नेपाल महोत्सवमा निःशुल्क खानाको व्यवस्था गर्न लागिएको हो । एनआरएन अष्ट्रेलियाका पब्लिक अफिसर समिम अनवरले एमएनटीभीसँग भने, अभिभावकहरुको लागि एनआरएनको सम्मान हो । यसका लागि एक्सपर्ट एजुकेशन एण्ड भिसा सर्भिसेजले प्रायोजन गरेको छ । एनआरएन अष्ट्रेलिया न्यूसाउथवेल्स राज्य समितिका सचिव भुपाल सिटौलाले भने लञ्च प्याकेटका साथ एक बोतल पानी पनि निःशुल्क दिइनेछ । ७ सयभन्दा बढी अभिभावकहरुले यसअघिको पिकनिक र भ्रमण कार्यक्रममा सहभागिता जनाउनुभएको थियो । अभिभावकहरुलाई यो हाम्रो सानो सम्मान हो । नेपाल महोत्सवमा पनि सैयौंको संख्यामा अभिभावकहरु आउने अपेक्षा गरिएको छ । यस पटकको नेपाल महोत्सवलाई विशेष गराउने भन्दै यसअघि नै आतिशबाजी गर्ने निर्णय भइसकेको छ भने कार्यक्रम आयोजनास्थल सिड्नीको डार्लिंग हार्बर वरपर नेपालको झण्डा र सगरमाथा, भगवान गौतम बुद्ध अंकीत भएका झण्डाहरु फहराइएका छन् । नेपाल महोत्सवमा सिड्नीमा रहेका नेपालीहरुको ठूलो संख्यामा सहभागिता रहने अपेक्षा गरिएको एनआरएन अष्ट्रेलियाका प्रवक्ता डा. ज्ञानेन्द्र रेग्मीले बताए । सिड्नीको नेपाल महोत्सवमा कन्दरा व्याण्डका साथै गायक सुगम पोखरेल, गायिका अञ्जु पन्त, लोकगायिका पौडेल मञ्जु पौडेल सहभागी हुँदैछन् । यसका साथै अष्ट्रेलियाका नेपाली कलाकारहरुले पनि आफ्नो प्रस्तुति दिनेछन् । यसैगरी नेपाली साहित्यकारहरुले आफ्नो सिर्जना प्रस्तुत गर्नेछन् ।