भिक्टोरियामा बसोबास गर्ने नेपालीहरुको प्रतिनिधि संगठन नेप्लीज एशोसिएसन अफ भिक्टोरियाले निर्माण गरेको नेपाली क्रिकेट टिम मेलबर्न रेनिगेड्स च्याम्पियन्स लिग २०१६ को सेमिफाईनलमा प्रवेश गरेको छ । आईतबार सम्पन्न खेलमा प्रतिस्पर्धी वैरवी लायन्सलाई २४ रनले पराजित गर्दै न्याभ क्रिकेट टिम सेमिफाईनलमा प्रवेश गरेको हो । ट्वन्टी ट्वान्टी क्रिकेटको यो खेलमा क्याप्टेन रोशन पौडेल र सजेन्द्र श्रेष्ठले तीन तीन विकेट लिएका थिए भने विकेश श्रेष्ठ एक्लैले ४६ रनको योगदान दिएका थिए । यसअघि डिफेन्डिंग च्याम्पियन एनडब्लुएस टिमलाई पराजित गर्दा क्याप्टेन सुनम गौतमले अविजित रहँदै १ सय १३ रनको योगदान दिएर टिमले १ सय ५० रनको लक्ष्य पूरा गरेको थियो । यस साता क्याप्टेन गौतमविनै मैदानमा उत्रिएको टिमले समेत प्रतिस्पर्धीलाई पराजित गर्दै सेमिफाईनल सुरक्षित गरेको हो । नेप्लीज एशोसिएसन अफ भिक्टोरियाले मेलबर्नका विभिन्न नेपाली क्लबबाट खेल्ने उत्कृष्ट खेलाडीहरुलाई समेटेर न्याभ क्रिकेट टिम निर्माण गरेको थियो । नेपाली समूदायको तर्फबाट अन्य क्लबहरुसँग खेल्ने प्रतियोगितामा सहभागी हुने यो टिमको लक्ष्य हो । रेनिगेड्स च्याम्पियन्स लिग २०१६ मा विभिन्न समूदायका १२ टिम सहभागी छन् । खेलपछि प्रतिक्रिया दिँदै न्याभका उपाध्यक्ष एवं क्रिकेट संयोजक तारा गैरेले भने, “अघिल्लो वर्षको विजेतालाई पनि हामीले हराएका छौं । अब सेमिफाईनलमा समेत पुगेको यो अवस्थामा समूदायको साथ अझ बढी हामीलाई चाहिएको छ । आगामी सेमिफाईनलमा धेरैभन्दा धेरै भिक्टोरियावासीको उपस्थिति भयो भने खेलाडीहरुलाई हौसला मिल्नेछ ।” नेपाली टिमको प्रशिक्षक हुसेन हनिफ हुन् भने टिमको नेतृत्व सुनम गौतमले गरेका छन् । गौतम मेलबर्नको प्रिमियर लिगमा खेल्ने नेपाली क्रिकेटर हुन् । त्यसैगरी रोशन पौडेल उपकप्तान छन् भने सुसन गुरुंग, सुमन सिंह, आकाश सिंह, केशव पन्त, भूषण श्रेष्ठ, विकास श्रेष्ठ, सुरज थापा, किशोर कँडेल, कुशल तुलाधर, सजेन्द्र श्रेष्ठ, अनिल खनाल, अतुल्या रावल र आशिष दाहाल न्याभ क्रिकेट टिममा छन् । सेमिफाईनल भिडन्त आगामी ११ डिसेम्बर विहान ९ बजे हुनेछ । क्रिकेट मैदानको टुंगो लागेपछि यस विषयमा जानकारी सार्वजनिक गरिने पनि गैरेले एमएनटीभीलाई बताए ।