नेप्लीज अष्ट्रेलियन युथ एशोसिएसन नयाले नेपालको राष्ट्रिय खेल भलिबलको प्रतियोगिता यही ३० जुलाई आईतबार सिड्नीमा गर्ने भएको छ । सिड्नीका ८ र मेलबर्नको उक भलिबल टिम सहभागी हुने प्रतियोगिताको सम्पूर्ण तयारी पूरा भएको नयाले जनाएको छ । खेलको माध्यमबाट युवावर्गलाई प्रोत्साहित गर्दै आएको नयाले स्थानीय पिसीवाईसी क्लब म्यारिकभिलमा प्रतियोगिता गर्न लागेको हो । प्रतियोगिता संयोजक धिरोज मल्लले नेपाल सरकारको निर्णयपछि राष्ट्रिय खेल बनेको भलिबलको प्रतियोगिता आयोजना गर्नु खुशीको कुरा भएको बताए । उनल ेभने, नेपाल सरकारको यो निर्णयको स्वागतका लागि पनि प्रतियोगिता गरेका हौं । यस प्रतियोगितामा प्रथम हुने टिमलाई १३०० अस्ट्रेलियन डलर पुरस्कार प्रदान गरिनेछ । नेपालको राष्ट्रिय खेलको यस प्रतियोगितामा सहभागी भई खेलाडीहरुलाई प्रोत्साहन दिन पनि मल्लले सिड्नीवासीलाई आह्वान गरेका छन् । खेल बिहान नौ बजे देखि साँझ ६ बजे सम्म चल्नेछ ।