भारतको कोलकाता निवासी अग्नीश्वर चक्रवर्ती पक्राउ परेका छन् । कोलकाता प्रहरीले उनलाई सामाजिक सञ्जालमा खुला रुपमै एक युवतीलाई बलात्कारको धम्की दिएको पाएपछि पक्राउ गरेको हो । अग्नीश्वरले मेलबर्न निवासी एक भारतीय मूलकी युवतीलाई यस्तो मेसेज पठाएको र यो मेसेज सामाजिक सञ्जालमा भाईरल बनेपछि प्रहरीले आफ्नो सक्रियता देखाएको हो । कोलकाता प्रहरीले निजलाई पक्राउ गरिसकिएको र निजको फोन समेत बरामद गरी कारवाही अगाडि बढाइएको बताएको छ । भारतभर यतिबेला उक्त युवाको हर्कतको विरोध भइरहेको छ भने उनका विरुद्ध पेटेसन पनि दर्ता गरिएको छ । जसमा हजारौंले हस्ताक्षर गरिसकेका छन् । मेलबर्नमा पढिरहेकी युवतीले आफुलाई स्काईपमा अग्नीश्वरले स्माईली आईकन पठाएको, त्यसलाई डिलिट गरेपछि तथानाम गाली गरेको बताएकी छिन् । युवतीसँगै उसको भाईलाई पनि मार्ने धम्की अग्नीश्वरले दिएका थिए । ईन्जिनियरिङ गरेको २४ वर्षीय युवाको दिमागमा कसरी यस्तो नकारात्मक र आक्रोशपूर्ण स्वभाव विकसित भयो भनेर धेरैले प्रश्न गरेका छन् । अनुसन्धानपछि निज युवालाई तीन वर्षसम्मको जेल सजाय हुने भएको छ ।