विभिन्न व्यक्तिको हत्यामा संलग्न हुँदै मानिसहरुलाई मार्ने धम्की दिएर फिरौती असुल गर्ने मनोज पुन र उनका सार्प सुटरलाई प्रहरीले गोली हानेर मारिदिएको छ । प्रहरी इन्काउन्टरमा मारिएको भनिएपनि यसको स्वतन्त्र पुष्टि भने भएको छैन । प्रहरीको दावी अनुसार मनोज पुन र सोम आलेले पक्राउ गर्न खोज्दा प्रहरीमाथि नै गोली चलाएका थिए । प्रहरीतर्फ के कस्तो क्षति भएको छ भन्ने थाहा भएको छैन ।
एसएसपी दीपक थापाका अनुसार उनीहरु नेपाल आएको सीआईबी र नेपाल प्रहरीको संयुक्त टोलीले पत्ता लगाएपछि सर्च अभियान चलाएको थियो । सोक्रममा देवदह नगरपालिका ४ भवानीपुरमा प्रहरीसँग जम्काभेट भएको थियो । त्यसपछि पक्राउ गर्ने क्रममा प्रहरीलाई आक्रमण गर्दै भाग्न खोजेपछि जवाफी कारबाहीमा मारिएको थापाले जानकारी दिए ।
घटनास्थलमा गोली लागेर घाइते भएका दुबै जनालाई तत्काल उपचारको लागि लुम्विनी अञ्चल अस्पताल बुटवलमा लगिएको थियो । उनीहरुको त्यहीँ बुधबार बिहान मृत्यु भएको हो ।
कुख्यात गुण्डा नाइके मनोज पुन प्रहरीको मोस्टवान्टेड सूचीमा थिए । उनले युवासंघ रुपन्देहीका अध्यक्ष दुर्गा तिवारीको हत्याको जिम्मा लिएका थिए । साथै निर्माण व्यवसायी महासंघका अध्यक्ष शरद गौचनको हत्यामा पनि उनकै संलग्नता रहेको बताइन्छ ।