रमन अधिकारी/ एडिलेड

एडिलेड भजन किर्तन समुहको मुख्य आयोजनामा शिवरात्री पर्व धुमधामका साथ मनाइएको छ ।
नेपालमा जस्तै भव्य मण्डप बनाएर शिवजीको आराधना गरिएको थियो भने भक्तजनहरु व्यवस्थित भई लाईनबद्ध बनेर पूजा गरेका थिए । नेपालबाट आफ्ना सन्तानहरुलाई भेट्न अष्ट्रेलिया आएका अभिभावकहरुको उल्लेख्य सहभागिता रहेको शिवरात्रीको सञ्चालन सहित्यकार एवं समुहका सचिव आरके शर्माले गरेका थिए। लगातार भजन र किर्तनले भक्तजनहरुलाई कुनै शिवालयमै रहेको अनुभूति दिएको कार्यक्रमको संयोजनकारी भुमिका समुहका सदस्य दया पराजुलीले गरेका थिए । अष्ट्रेलियामा हुर्केपनि नेपालीका दोश्रो पुस्ताका बालबालिकाहरुलाई आफ्नो कला, संस्कृति र परम्पराबारे जानकारी दिन यस्ता कार्यक्रम उपयोगी हुने पराजुलीको ठम्याई छ । उत्साहपूर्ण सहभागिताबाट हौसिएका भजन कीर्तन समूहका अध्यक्ष गणेश पराजुलीले एमएनटीभीसँग कुरा गर्दै सम्पुर्ण संघ संस्थाको सहयोगले भजन किर्तन समुह यति छोटो समयमै यतिधेरै उपलब्धी हासिल गर्न सफल भएको बताए ।