भिक्टोरियामा बसोबास गर्ने नेपालीहरुको साझा संगठन नेप्लीज एशोसिएसन अफ भिक्टोरिया न्याभको आयोजनामा मेलबर्नमा तेश्रो न्याभ मल्टिकल्चरल कप क्रिकेट प्रतियोगिता हुने भएको छ । ३० मार्चबाट सुरु हुने यो प्रतियोगिता ७ अप्रिलमा सम्पन्न हुनेछ । बुधबार स्थानीय बिग बेली एशियन क्याफेमा आयोजना गरिएको पत्रकार सम्मेलनमा न्याभका खेल संयोजक प्रेमराज उप्रेतिले प्रतियोगिताको बारेमा जानकारी गराएका थिए । उनले श्रीलंकाको तमिल वारियर्स, अफगानिस्तानी समूदायको अल नेशन्स सहित तीन नेपाली टोली सहभागी हुने बताए । जसमा न्याभ कप क्रिकेटको विजेता नारे किङ्स, उपविजेता रोयल राइनोज र एक्सपर्ट क्रिकेट क्लब सहभागी हुनेछन् । प्रेस्टनमा रहेको टीडब्लू ब्लेक पार्कमा प्रतियोगिता आयोजना गरिनेछ भने यसको मुख्य प्रायोजन ग्रेस ईन्टरनेशनल रहेको छ । पत्रकार सम्मेलनमा ग्रेसका निर्देशक रामचन्द्र पौडेल पनि सहभागी भएका थिए । उक्त अवसरमा न्याभका पूर्वअध्यक्ष डा. अनुपम पोखरेललाई मल्टिकल्चरल क्रिकेटको ब्रान्ड एम्बेसडर तोकिएको जानकारी समेत दिइयो । ६ टिमको सहभागिता निश्चित भएपनि अन्तिम समयमा पाकिस्तानी टिम नआउने बताइएको थियो ।