तीजको रमझम तास्मानियामा, सेप्टेम्बर पहिलो तारिखमा तीज महोत्सव
अष्ट्रेलियाको तास्मानियास्थित लान्चेष्टनमा आगामी सेप्टेम्बर १ तारिख तीज महोत्सव हुने भएको छ । काम र पढाईको सिलसिलामा त्यहाँ बसोबास गरिरहेका नेपालीहरुलाई लक्षित गरेर आयोजना गरिएको कार्यक्रममा नायिका आँचल शर्मा प्रमुख आकर्षण छिन् भने हाउडेमायाको नामले चर्चित सिर्जना खत्रीले पनि आफ्नो प्रस्तुति दिनेछिन् । यस्तै स्थानीय कलाकारहरुको प्रस्तुतिका साथमा गायक हृदय दाहालले पनि आफ्नो गीत प्रस्तुत गर्ने तयारी गरिएको छ । स्थानीय म्याक्स फ्राई हलमा साँझ ५ बजेदेखि पाँच घण्टाका लागि आयोजना हुने यो तीज महोत्सवको आयोजना नर्दन तास्मानिया नेपाली समाजले गरेको हो । 
