आत्महत्यामा दुरुत्साहन गरेको आरोपमा छानविनका लागि पक्राउ गरिएका न्यूज २४ टेलिभिजनको कार्यक्रम सिधा कुरा जनतासँगका प्रस्तोता रवि लामिछानेलाई चितवन जिल्ला अदालतमा म्याद थपका लागि पेश गरिएको छ । बाहिर अत्यधिक मानिसहरुले विरोध प्रदर्शन गरेपछि उनलाई सुटुक्क पछिल्लो ढोकाबाट अदालतमा लगिएको थियो । बाहिर प्रदर्शन गरिरहेकाहरुले यो चाल नै पाएनन् । प्रदर्शनको क्रममा सडकमा आएका व्यक्तिहरुले हाम्रो रवि हाम्रो देश प्राणभन्दा प्यारो छ भन्ने नारा लगाएका छन् । उनीहरुले रविलाई तत्कालै रिहा गर्नुपर्ने माग गरेका छन् । मिडियासँग कुरा गर्दै प्रहरी प्रशासनले रविलाई फसाउन खोजेको र यस्तै अवस्था रहे कुलमान घिसिंगलाई पनि फसाउनसक्ने भन्दै आफ्नो तर्क राखिरहेका छन् । अदालतले २५ दिनसम्मको म्याद थप गर्न सक्छ । अथवा उसले केही दिनको म्याद दिएको अवस्थामा फेरि केही दिनपछि म्याद थपका लागि प्रहरीले अदालत ल्याउन सक्छ । तर, अधिकतम २५ दिनभन्दा बढी म्याद अनुसन्धानका लागि थप्न मिल्दैन । यही २५ दिनभित्रै अनुसन्धान टुंगाएर सरकारी वकिल मार्फत अदालतमा पेश गर्नुपर्ने कानूनी प्रावधान छ ।