गोरखामा ढुंगाले हानेर वृद्धाको हत्या गर्ने एक किशोरलाई प्रहरीले पक्राउ गरेको छ । जिल्लाको शहीद लखन गाउँपालिका–३ मनकामनामा एक किशोरले ढुंगाले हिर्काउँदा वृद्धाको मृत्यु भएको हो । खेतमा पानी लगाएर फर्किएकी ७२ वर्षीया कृष्णकुमारी आलेलाई गत बिहीबार सामान्य विवादमा स्थानीय एक १७ वर्षका किशोरले ढुंगाले टाउकोमा हिर्काउँदा मृत्यु भएको प्रहरीले जनाएको छ ।

किशोरलाई आइतबार गाउँलेको सहयोगमा मनकामनाको वनौतीबाट पक्राउ गरेको जिल्ला प्रहरी प्रमुख एसपी सुरेन्द्रबहादुर गुरुङले बताए । पक्राउ परेका किशोरको प्रहरीले नाम खुलाएको छैन । उनीविरुद्ध ज्यानसम्बन्धी मुद्धामा अनुसन्धान गर्न जिल्ला अदालतबाट ५ दिनको म्याद लिएको छ ।

वृद्धाको परिवारले किशोरविरुद्ध हत्या आरोपमा किटानी जाहेरी दिएका छन् । प्रहरीका अनुसार किशोरले पनि हत्या गरेको स्वीकार गरेको छ । ‘प्रारम्भिक अनुसन्धानबाट कर्तव्य गरेरै मारेको देखिन्छ’ एसपी गुरुङले भने, ।