काठमाडौँको कमलादीमा साढे १४ किलो नक्कली सुन र पेस्तोल फालेर भाग्ने तीन जनालाई पक्राउ गरिएको छ । कमलादीमा १५ किलो धातुमध्ये आधा किलो सुन, साढे १४ नक्कली सुन र २ पेस्तोल छाडेर भागेकामध्ये तीनजना पक्राउ परेका छन् ।

उनीहरु तीनैजना पूर्वी–नवलरपासीबाट पक्राउ परेका हुन् । पक्राउ पर्नेमा बा६च ५५१९ नम्बरको गाडीबाट सुन र पेस्तोल भएको झोला फाल्ने तीनजना भएको प्रहरीले जनाएको छ । उनीहरु तीनजना सँगै एकजना ट्याक्सी चालक पनि पक्राउ परेका हुन् ।

प्रहरीका अनुसार ट्याक्सी चालक भने उपत्यका बाहिरबाट बिरामी लिएर काठमाडौं आएको र फर्किने क्रममा उनीहरुलाई भाडामा लगेको खुलेको छ । उनीहरु पूर्व नवलपरासीबाट भारततर्फ भाग्ने योजनामा थिए । पक्राउ परेका सबैलाई काठमाडौं ल्याउने तयारी भइरहेको छ ।